މި ދުވަސް ފާހަގަކުރުމަށް ބޭއްވުނު ހަފްލާގެ ޝަރަފުވެރި މެހެމާނެއްގެ ގޮތުން ބައިވެރިވެވަޑައިގެންނެވީ ސޯޝަލް އެންޑް ފެމިލީ ޑިވެލޮޕްމެންޓް މިނިސްޓަރު ޑރ. އައިޝަތު ޝިހާމެވެ.
މި ހަފްލާގައި މިނިސްޓަރު ދެއްކެވި ވާހަކަފުޅުގައި މި މަރުކަޒުގައި ފަރުވާ ހޯދަމުންދާ ފަރާތްތަކަށް ހިދުމަތް ފޯރުކޮށްދެއްވަމުން ގެންދަވާ އެންމެހައި ފަރާތްތަކުގެ އަގު ވަޒަން ކުރައްވާ އެފަރާތްތަކަށް ޝުކުރުދެންނެވި އެވެ.
މި ހާއްސަ ހަފްލާގައި މަރުކަޒަށް 20 އަހަރު ހިދުމަތް ކުރައްވާފައިވާ 18 ފަރާތަކަށް ހަނދާނީ ޝީލްޑްވެސް ވަނީ ހަވާލުކުރެވިފަ އެވެ.
މިރޭ ބޭއްވުނު ހަފްލާގައި ފަރުވާ ހޯދަމުންދާ ފަރާތްތަކަށް ހާއްސަކޮށް، އަލަށް ފަށަން ހަމަޖެހިފައިވާ އެކި ކަހަލަ ހުނަރުތައް ދަސްކޮށްދިނުމުގެ ހަތަރު ތަމްރީނު ޕްރޮގްރާމެއް މިނިސްޓަރު އާއިޝަތު ޝިހާމް ވަނީ އިފްތިތާހު ކޮށްދެއްވާފަ އެވެ.
މީގެތެރޭގައި، ކުރެހުމުގެ ކޯހަކާއި ސްކްރީން ޕްރިންޓިން ކޯހަކާއި، ފަހާ ކޯހެއް އަދި ކައްކާ ކޯހެއް ހިމެނެއެ ވެ.
މި ހަފްލާގައި ވާހަކަފުޅުދައްކަވަމުން މިނިސްޓަރު ވިދާޅުވީ އޯގާތެރި މުޖުތަމައެއް ބިނާކުރުމަށް ރައީސް ޑރ. މުހައްމަދު މުއިއްޒު ގެންގުޅުއްވާ ތަސައްވުރު ފުރިހަމަކުރުމުގެ ގޮތުން، މަރުކަޒުގެ ހިދުމަތްތައް ފުޅާކުރުމަށް ގިނަ މަސައްކަތްތައް ކުރެވެމުންދާކަމަށެވެ.
އެގޮތުން ފަރުވާ ބޭނުންވާ ފަރާތްތަކަށް ފަރުވާ ދީ، ތަމްރީނާއި ތެރަޕީގެ އެހީތެރިކަމާއެކު މުޖުތަމައުގެ އެހެން ފަރުދުންނާއި އެއް ހަމައެއްގައި އުޅެ، ދިރިއުޅުމުގެ ޒިންމާތައް އުފުލައި މުޖުތަމަޢުގައި އަބުރުވެރި ދިރިއުޅުމެއް އުޅުމުގެ ފުރުސަތު ހޯދައިދިނުމަށް މިހާރު އެމަރުކަޒުގައި ގިނަ މަސައްކަތްތަކެއް ކުރެވޭކަން މިނިސްޓަރު ފާހަގަކުރެއްވި އެވެ.
ސަރުކާރަށް ހަ މަސް ވުމާ ގުޅިގެން ސޯޝަލް އެންޑް ފެމިލީ ޑިވެލޮޕްމެންޓް މިނިސްޓްރީން މިފަހުން ބޭއްވި ނޫސްވެރިންގެ ބައްދަލުވުމުގައި އެ މިނިސްޓްރީގެ ޑެޕިއުޓީ މިނިސްޓަރު އާމިނަތު އިސްމާއިލް ވިދާޅުވީ އެ މިނިސްޓްރީން ބެލި އިރު އެންމެ މުހިންމު ކަމަކަށް ފާހަގަވީ އެ މަރުކަޒުގައި ފަރުވާއަށް ފަހު ވެސް އާއިލާތަކުން ހަވާލުނުވުމުން 20 އަހަރު ވަންދެން މީހުން ތިބެން ޖެހިފައިވާ ވުމެވެ.
އެހެންވެ ސަރުކާރުން މިހާރު އަންނަނީ ގުރައިދޫ މަރުކަޒަށް ގެންދާ މީހުންނަށް ފަރުވާދީ ރަނގަޅުވިޔަސް އާއިލާތަކުން އެ މީހުންނާ ހަވާލުނުވާ މައްސަލަ ހައްލުކުރަން ފަރުވާއަށް ފަހު މަރުކަޒުގައި ބޭތިއްބޭނެ މުއްދަތެއް ކަނޑައަޅަން މަސައްކަތް ކުރަމުންނެވެ.
ގުރައިދޫ މަރުކަޒުން ބަލަހައްޓާ އުމުރުން ދުވަސްވީ އަންހެނުން ތިބޭ ވޯޑުގައި ދިރިއުޅޭ ބަޔަކު - ފޮޓޯ: މިހާރު
1976 ވަނަ އަހަރު ގާއިމްކުރެވުނު ކ. ގުރައިދޫ ހާއްސަ އެހީއަށް ބޭނުންވާ މީހުންގެ މަރުކަޒުގެ މައިގަނޑު މަގުސަދަކީ ދައުލަތުގެ ބެލުމުގެ ދަށުގައި ފަރުވާ ހޯދަމުން އަންނަ ކޮންމެ ފަރާތަކީ އަބުރުވެރި، އުފާވެރި، އަދި އަމިއްލަ މިނިވަންކަމާއެކު ދިރިއުޅުމުގެ ފުރުސަތު ލިބިގެންވާ ފަރާތަކަށް ހެދުމާއި އެފަދަ ކޮންމެ ފަރާތަކަށްވެސް އެފަރާތްތަކުގެ ޢާއިލާއާއެކު މުޖުތަމަޢުގައި ހަމަޖެހޭ، ރީތި ދިރިއުޅުމެއް، ބާކީކުރުމެއް ތަފާތުކުރުމެއް ނެތި އުޅުމުގެ ފުރުސަތު ހޯދައިދިނުމެވެ.
ސޯޝަލް އެންޑް ފެމިލީ ޑިވެލޮޕްމެންޓް މިނިސްޓްރީން ބުނާގޮތުން ގޮތުގައި ގުރައިދޫ މަރުކަޒުގައި މިވަގުތު ޖުމްލަ 221 މީހުން އެބަތިއްބެވެ. އޭގެ ތެރޭގައި ހިމެނެނީ ނަފްސާނީ މައްސަލަތަކަށް ފަރުވާ ހޯދަމުން އަންނަ 183 މީހުންނާއި އުމުރުން ދުވަސްވީ 31 މީހުންނާއި އެނދުމަތިވެފައިވާ 15 މީހުންނެވެ.
މިދިޔަ އަހަރު ނޮވެމްބަރުން ފެށިގެން ފަރުވާ ފުރިހަމަ ކުރުމަށްފަހު އާއިލާތަކާ ހަވާލުކޮށްފައިވާ 15 މީހަކާއި ފަރުވާ ފުރިހަމަ ކުރުމަށްފަހު މުޖުތަމައުއަށް ނެރުމުގެ މަސައްކަތް ކުރާ 24 މީހެއް ހިމެނޭ ކަމަށް ވެސް މިނިސްޓްރީން ބުންޏެވެ.
ދޮށީ އުމުރުގެ މީހުން މަރުކަޒު ކުރުމަކީ އެންމެ ރަނގަޅު ގޮތް ނޫނަސް، ރާއްޖޭގައި ދޮށީ އުމުރުގެ މީހުންނަށް ހާއްސަކޮށް، ރަނގަޅު އޯލްޑްއޭޖް ފެސިލިޓީތަކެއް ނެތުމުން، ގުރައިދޫ މަރުކަޒަށް ގެންދިއުން ނޫން އިތުރު ގޮތެއް ވެސް ނެތެވެ. އެ މަރުކަޒުގައި އެ އުމުރުގެ މީހުންނަށް ބޭނުންވާ ގިނަ ވަސީލަތްތައް ނުހުރެ އެވެ.
މި ސަރުކާރުގެ ވިސްނުމަކީ މާލެ އާއި ރަށްރަށުގައި ވެސް އުމުރުން ދުވަސްވީ މީހުންނަށް ހާއްސަ މަރުކަޒުތަކެއް ހަދައި ވަސީލަތްތައް ގާއިމްކޮށްދީގެން ހައްލު ހޯދުމެވެ. މާލޭގައި ކުރީގެ ނާދީ އާއި ހުޅުމާލޭގައި މަރުކަޒު ގާއިމްކުރުމުގެ މަސައްކަތް އަންނަނީ ކުރަމުންނެވެ
