ޝަކީލް މިހެން ވިދާޅުވީ ހައްޖަށް ދިއުމަށް ފައިސާ ދައްކާފައިވާ މީހުން ތިއްބާ އެ މީހުންނަށް ފުރުސަތު ނުދީ ހައްޖު ކިޔުގެ ބޭރުން ބަޔަކަށް ފުރުސަތު ދީފައިވާ ކަމަށް ސޯޝަލްމީޑިއާގައި ބައެއް މީހުން ބުނަމުންދަނިކޮށެވެ.
އެކްސްގައި ޝަކީލް ކުރެއްވި ޕޯސްޓެއްގައި ވިދާޅުވީ ހައްޖު ކޯޕަރޭޝަންގެ ހައްޖު ކިއުގެ ނިޒާމް ހަމަޖެހިފައިވާ ގޮތުން އެއްވެސް ފަރާތެއްގެ ނުފޫޒެއް ހައްޖު ކިއު އަކަށް ނުފޯރުވޭނެ ކަމަށެވެ
ރާއްޖެއިން މި އަހަރު ޖުމްލަ 1،150 މީހުން ހައްޖަށްދިއައެވެ. މި ހުރިހާ މީހުންވެސް ހައްޖަށް ދިޔައީ ހައްޖު ކޯޕަރޭޝަންގެ ހަވާލުގައި އެވެ.
ހިލޭ ހައްޖަށް ގެންދަނީ ފަގީރުންނާއި މިސްކީނުންގެ ދަފްތަރުގައި ރަޖިސްޓްރީކޮށްފައިވާ އަދި ހައްޖުގެ އަޅުކަން ކުރިން އަދާކޮށްފައި ނުވާ މީހުން ކަމަށް ސަރުކާރުން ކުރިން ވަނީ ބުނެފަ އެވެ. ނަމަވެސް ނިކަމެތިން ހިލޭ ހައްޖަށް ފޮނުވުމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުގެ ދަށުން ފުރަތަމަ 50 މީހުން މިއަހަރުގެ ހައްޖުގެ އަޅުކަމަށް ފުރާފައިވާއިރު އޭގެ ތެރޭގައި ފަގީރު ނޫން މީހަކު ހިމެނޭ މައްސަލައެއް މިއަދު ވަނީ ފެންމަތިވެފަ އެވެ.
މިކަމާއި ގުޅިގެން އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވި އެ މައްސަލަ ބަލަމުންދާ ކަމަށެވެ. އަދި ފާޑުކިޔުންތަކުން ދިފާއުވުމަށް ވިދާޅުވީ ފަގީރުންގެ ލިސްޓަކީ ކުރީ ސަރުކާރުގެ ދުވަސްވަރު އެކުލަވާލި ލިސްޓަށް ކަމަށެވެ.
