އައްޑޫ ސިޓީގައި ގާމެންޓް ފެކްޓަރީއެއް ގާއިމުކުރުމަށް ބީސީސީއަށް ބިން ކުއްޔަށް ދޫކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައި ވަނީ އައްޑޫ ސިޓީ ކައުންސިލް އިދާރާގަ އެވެ. ބީސީސީގެ ފަރާތުން އެއްބަސްވުމުގައި ސޮއި ކުރައްވާފައި ވަނީ އެ ކޯޕަރޭޝަނުގެ ޑެޕިއުޓީ މެނޭޖިން ޑިރެކްޓަރު ސާމިހް އާދަމެވެ. އައްޑޫ ސިޓީ ކައުންސިލުގެ ފަރާތުން ސޮއިކުރެއްވީ އެ ކައުންސިލުގެ ޑެޕިއުޓީ މޭޔަރު، މުހައްމަދު ޝުއާއު އެވެ.
މި އެއްބަސްވުމުގެ ދަށުން އައްޑޫ ސިޓީގެ ހިތަދޫގައި އަޅާ ގާމެންޓް ފެކްޓަރީ ހިންގުމަށް ހަމަޖެހިފައި ވަނީ ބީސީސީންނެވެ.
ބީސީސީން ބުނީ އައްޑޫގައި ގާމެންޓް ފެކްޓަރީއެއް އަޅަނީ ރާއްޖޭގައި ކުރެވިދާނެ މަސައްކަތްތައް ކޮށްގެން އިގުތިސޯދު ވަރުގަދަ ކުރުމަށް ކަމަށެވެ. ވަޒީފާގެ ފުރުސަތުތައް އިތުރުކޮށް، ރާއްޖެއަށް އެތެރެކުރާ މުދާ މަދުކުރުމަކީ ފެކްޓަރީ އެޅުމުގެ ބޭނުމެއް ކަމަށް އެ ކޯޕަރޭޝަނުން ބުނެ އެވެ.
ގާމެންޓް ފެކްޓަރީ އާއެކު ކުދި އަދި މެދުފަންތީގެ ވިޔަފާރިތަކަށް އިތުރު ފުރުސަތުތައް ފަހިވެގެންދާނެ ކަމަށް ވެސް ބީސީސީން ވަނީ ބުނެފަ އެވެ.
ބީސީސީން 2019 ވަނަ އަހަރުގެ ޑިސެމްބަރު މަހުގެ ތެރޭގައި އައްޑޫގައި ގާއިމުކުރާ ގާމެންޓް ފެކްޓަރީއަށް ކޮންސަލްޓެންސީ މަސައްކަތް ކޮށްދޭނެ ފަރާތެއް ހޯދުމަށް ބީލަމަށް ހުޅުވާލި އެވެ. އެގޮތުން ޕްރޮޖެކްޓަށް ރެޖިސްޓާ ވުމުގެ ފުރުސަތު ހުޅުވާލައި ކަމާ ގުޅުންހުރި މައުލޫމާތު ސެޝަނެއް ބޭއްވުމަށް ވެސް އޭރު ހަމަޖެއްސި އެވެ.
އައްޑު އަތޮޅު ގަމުގައި މީގެ ކުރިން ކާމިޔާބުކަމާ އެކު ފެކްޓްރީއެއް ވަނީ ހިންގާފަ އެވެ. އެހެންނަމަވެސް މައްސަލަތައް ދިމާވެ އެ ފެކްޓްރީ ފަހުން ބަންދުކުރި އެވެ.