އިސްލާމިކް މިނިސްޓަރު މިހެން ވިދާޅުވީ، ހައްޖައް ފުރާވަޑައިގަތުމުގެ ކުރިން ނޫސްވެރިންނާއި ބައްދަލު ކުރައްވާ ދެއްކެވި ވާހަކަފުޅުގަ އެވެ.
މިނިސްޓަރ ވިދާޅުވީ، މިކަމަކީ ބައެއްގެ އަޅުކަމާއި ގުޅޭ ކަމެއްކަމަށާއި، އަޅުކަން ކުރަން ގޮސްތިބި ފަރާތްތަކާއި އެމީހުންގެ އާއިލާ ތަކަށް ލިބިފައިއޮތް އުފާވެރިކަން ނިގުޅައިގަތުމަށް އެއްވެސް ފަރާތަކުން މަސައްކަތް ކޮށްގެން ނުވާނެ ކަމަށެވެ.
މީހަކަށް ހައްޖުކުރުމުގެ ނަސީބު ލިބުމަކީ މާތްﷲ މުސްލިމަކަށް ދެއްވާނެ ވަރަށް މަތިވެރި އުފަލެއް ކަމަށެވެ.
މިނިސްޓަރ ވިދާޅުވީ، ރާއްޖޭގެ ފަގީރުންގެ ގައުމީ ދަފްތަރަކީ ވަރަށް އިތުބާރު ހުރި ދަފްތަރެއް ކަމަށާއި، މި ދަފްތަރުގެ އިތުބާރު ނަގާލަން މަސައްކަތް ކޮށްގެން ނުވާނެ ކަމަށެވެ.
މިނިސްޓަރު ވިދާޅުވީ، ދޮގު ވާހަކަތައް ދެއްކުމުގެ ސަބަބުން ހާޖީންގެ ހިތުގައި ޝައްކުތަށް އުފެދޭ ކަމަށާއި އެހެން ކަމުން މިކަހަލަ ވާހަކަ ނުދެއްކުމަށް ވިދާޅުވެފަ އެވެ.
ސަރުކާރުގެ ހަރަދުގައި މީހުން ހައްޖަށް ފޮނުވުމާއި ގުޅިގެން އިދިކޮޅު ފަރާތްތަކުން ސަރުކާރަށް ފާޑުކިޔުން އަމާޒު ކުރަމުން ދާތީ މިނިސްޓަރ ވިދާޅުވީ، ސަރުކާރުގެ ހަރަދުގައި ހައްޖަށް ގެންދާތީ ބައެއް އިލްމުވެރިން ދެއްވާ ފަތުވާތަކުގެ ސަބަބުން ހައްޖުވެރިންގެ ހިތުގައި ޝައްކުތައް އުފެދި، އެކަމާ ދެރަވެ ސައުދީގައި ތިބި ދިވެހި ދީނީ އިލްމުވެރިންނާ ސުވާލުތައް ކުރަމުންދާ ކަމަށެވެ.
މީގެ އިތުރުން މިނިސްޓަރ ވިދާޅުވީ، ހައްޖަށް މީހުން ގެންދިޔުމުގައި އިންސާފުން ބޭރުން ހިނގާ އެއްވެސް ކަމެއް ނޯންނާނެ ކަމަށާއި ހާޖީންގެ އުފާވެރިކަމަށް ދަތިވާ ކަމެއް ނުކުރުމަށް ވަނީ އެދިވަޑައިގެންފަ އެވެ.
