އެމަނިކުފާނު މިހެން ވިދާޅުވި ކުޑަކުދިންނާއި ޒުވާން ޖީލު ދުންފަތުން ސަލާމަތް ކުރުމަށް "ދަފަރާ"ގެ ނަމުގައި ހެލްތް ޕްރޮޓަކްޝަން އެޖެންސީ، އެޗްޕީއޭއިން ހާއްސަ ކުރި ކެމްޕެއިނެއް އިފްތިތާހުކުރުމާއި އަދި ދުނިޔޭގެ ދުންފަތުގެ އިސްތިއުމާލު ނުކުރާ ދުވަސް ފާހަގަކުރުމަށް މިރޭ ނ. މަނަދޫގައި ބޭއްވި ރަސްމިއްޔާތެއްގައި ވާހަކަދައްކަވަމުން ނެވެ.
މިނިސްޓަރު ވިދާޅުވީ ޝީޝާ ބުއިމަކީ ފަހުގެ ޖީލުގެ ޒުވާން ކުދިން މިހާރު ކުރަން ފަށާފައިވާ ވަރަށް ނޭދެވޭ ކަމެއް ކަމަށާއި މުޖްތަމައުގައި ދުންފަތުގެ އިސްތިއުމާލް ކުރުން ވަރަށް ބޮޑަށް އާންމު ވެފައިވާކަމަށެވެ. އެގޮތުން ސިންގިރޭޓް ބުއިމާއި ވޭޕް ކުރުން ކުރިއަތް ވުރެއް އާންމު ވެފައިވާކަން މިނިސްޓަރު ވިދާޅުވި އެވެ.
ދުންފަތުގެ އިސްތިއުމާލު ކުރުމާއި އެ ޒާތުގެ ކަންކަމަކީ އިންސާނުން ހަށިގަނޑަށް ގެއްލުންވާ ކަމެެއްކަން ފާހަގަކުރައްވައި މިނިސްޓަރު ވިދާޅުވީ އެކަމަށް ހޭލުންތެރިކުރުމަށް އަބަދުވެސް އެ ވާހަކަދައްކަން ވެއްޖެކަމަށެވެ.
މި ނުބައި ވަބާއިން ދުރުވުމަކީ ސިއްހަތަށް ކޮށްދެވޭ ފައިދާއެއްކަން ފާހަގަކުރައްވައި، މިނިސްޓަރު ވިދާޅުވީ އަހަރެއްގެ މައްޗަށް ސިނގިރޭޓު ގަތުމަށް 1.8 ބިލިއަން ރުފިޔާ ހޭދަކުރާކަން ރާއްޖޭގެ ހިސާބުތަކުން ދައްކާ ކަމަށެވެ.
މިނިސްޓަރު ވަނީ ބެލެނިވެރިން މި ކަމާއި މެދު ވިސްނާ ފިކުރުކޮށް ދަރިން އެކަމުން ސަލާމަތްކުރަން މަސައްކަތްކުރުން މުހިއްމުކަން ފާހަގަކުރައްވާފަ އެވެ. އެގޮތުން ދަރިން ތަރުބިއްޔަތު ކުރުމުގައިވެސް ބެލެނިވެރިން މިހާރަށްވުރެ ވިސްނަންޖެހޭ ކަންކަން ހުރިކަމަށެވެ.
ރާއްޖޭގައި ދުންފަތުގެ އިސްތިއުމާލުކުރާ ކުޑަކުދިންގެ ނިސްބަތް ވެސް އިތުރެވެ. އެގޮތުން، އެޗްޕީއޭ އިން މީގެ ކުރިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި ރާއްޖޭގައި ކުޑަކުދިންގެ 45.7 އިންސައްތަ ކުދިން ދުންފަތުގެ އިސްތިއުމާލުކުރެއެވެ.
"ދަފަރާ" ކެމްޕެއިން އަކީ ދުންފަތުގެ ވަބާއިން ކުޑަކުދިންނާއި ޒުވާން ޖީލު ސަލާމަތް ކުރުމަށް ކުރެވޭ މަސައްކަތްޔަކުގެ ތެރެއިން ބެލެނިވެރިން ބާރުވެރި ކުރުމުގެ މަގްސަދުގައި ކުރިއަތް ގެންދިޔުމަށް ނިންމާފައިވާ ކެމްޕެއިނެކެވެ.
