އާސަހަރާގެ މަސައްކަތާއި ގުޅޭ ގޮތުން ނޫސްވެރިންނަށް މައުލޫމާތު ދެމުން އާޒިމް ވިދާޅުވީ އާ ސަހަރާ މިސްކިތުގެ މަސައްކަތް ވަރަށް ހަލުވިކަމާއި އެކު ކުރަމުންދާކަމަށެވެ. އަދި މިހާރު ކުރަމުން އަންނަނީ ތަން ނިންމުމުގެ މަސައްކަތްކަށެވެ.
އާޒިމް ވިދާޅުވީ މިހާރު މަސައްކަތް ދާ ސްޕީޑަށް ބަލައި އެންމެ ލަސްވެގެން އަންނަ އޮގަސްޓް މަހަށް މަސައްކަތް ނިންމާ ބޭނުންކުރަން ފެށޭނެކަމަށެވެ.
އާޒިމް ވިދާޅުވީ މަސައްކަތް ލަސްވީ ކުރެހުންތަކަށް ގެންނަން ޖެހުނު ބައެއް ބަދަލުތަކާއި ކޮންޓްރެކްޓަރުންނާ ވިދިގެން ޖެހުނު ބައެއް މައްސަލަތަކުގެ ސަބަބުން ކަމަށެވެ.
މާލޭގެ އާ ސަހަރާގެ ފުލް ފިނިޝިންގެ މަަސައްކަތްކޮށް ނިންމަން ކުންފުންޏަކާ ހަވާލުކުރީ މިދިޔަ މޭމަހުއެވެ.
އެ މަސައްކަތް ހަވާލުކުރީ ހައިމަން ކޮންސްޓްރަކްޝަން ޕްރައިވެޓް ލިމިޓެޑާއެވެ.
މަސައްކަތް އެ ކުންފުންޏާއި ހަވާލުކުރީ 2،70،3793.18 އަށެވެ. 60 ދުވަހުގެ ތެރޭގައި އެ މަސައްކަތް ނިންމަން ޖެހެ އެވެ.
އެ މަސައްކަތް ފުރަތަމަ ހަވާލުކުރި ކުންފުންޏަށް، މިދިޔަ އަހަރުގެ ސެޕްޓެމްބަރު މަހުގެ ނިޔަލަށް ދިން މުއްދަތަށް މަސައްކަތް ނުނިންމުމުން، އެެހެން ކުންފުންޏަކަށް މަސައްކަތް ހަވާލުކުރަން ބިޑު މަރުހަލާ ފެށީ ނިމިިދިޔަ އަހަރުގެ ނޮވެމްބަރު މަހުގެ ތެރޭގައެވެ.
އާ ސަހަރާ މަރާމާތުކުރުމުގެ މަޝްރޫއުގެ ދަށުން މިހާރު އެތަނުގައި ހުރި ބާ އިމާރާތް ތަޅާލައި މިސްކިތުގެ ޖާގަ ބޮޑުކޮށް، ލައުންޖަކާއި ހިނަވާގެއެއް ހެދުމުގެ މަސައްކަތް ދަނީ ކުރަމުންނެވެ.
އެ މަސައްކަތް ކުރިއަށް ދާތީ މިހާރު މާލޭގައި މަރުވާ މީހުންގެ ޖަނާޒާ ބާއްވަނީ ހުޅުމާލެގަ އެވެ.
މީގެ އިތުރުން މާފަންނު މަދަރުސާގެ މަރާމާތު މަސައްކަތްކޮށް ނިންމުމަށް ވެސް ކުންފުންޏަކާއި ވަނީ ހަވާލުކޮށް ފައެވެ. ސިޓީ ކައުންސިލުން އެ މަސައްކަތް ނިންމަން ހަވާލުކުރީ ޕްރޮޑަކްޓިވް ލޯކަލް އިންވެސްޓްމެންޓަށެވެ.
އެގާރަ ދުވަސްތެރޭ ނިންމަން އެ މަސައްކަތް ހަވާލުކުރީ 432،000 ރުފިޔާއަށެވެ.
ކައުންސިލުން މިއަދު ވަނީ ހުޅުމާލެ ސަހަރާ މިސްކިތު ގައި ނޮވިލޮން އެޅުމުގެ މަސައްކަތް އެރިސް ޑެކާ ވެސް ހަވާލުކޮށް ފައެވެ. ފަސް ދުވަސް ތެރޭ އެ މަސައްކަތް ނިންމަން އެ ކުންފުންޏާ އެކު ހެދި އެއްބަސްވުން ހެދީ 185،004 ރުފިޔާ އަށެވެ.
