މަސްޖިދުއް ނަމީރާގައި އިއްވެވި މިއަހަރުގެ ހައްޖުގެ ހުތުބާ އިއްވައިދެއްވީ އަލް މަސްޖިދުލް ހަރަމްގެ އިމާމް މަހާރް އަލް މުއައިގަލީ އެވެ.
ހައްޖު ހުތުބާ ފަށަމުން ﷲ ސުބްޙާނަހޫ ވަތަޢާލާއަށް ތަގުވާވެރިވުމަށް ގޮވާލައްވާފަ އެވެ. އަދި ދުނިޔޭގެ ޒީނަތްތެރިކަމަށް ނުހެއްލުމަށާއި މާތް ﷲ އަށް ތަގުވާވެރިވާ މީހުންނަށް ދެ ދުނިޔޭގައި ހެޔޮ ގޮތް މާތް ﷲ މިންވަރު ކުރައްވާނެކަމަށް ހުތުބާގައި ބުންޏެވެ. އަދި ﷲ އަށް ތަގުވާވެރިވާ މީހުންނަށް ލުއި ފަސޭހަ ގޮތްތައް މިންވަރުކުރައްވާނެކަމަށްވެސް ހުތުބާގައިވެ އެވެ.
ހައްޖު ހުތުބާ އަޑުއެހުމަށް މަސްޖިދުއް ނަމީރާއަށް ހައްޖުވެރިން ޖަމާވެ
ހުތުބާގައި ބުނީ އިސްލާމްދީނުގެ ފަސް ރުކުނަށާއި އީމާންކަމުގެ ހަ ރުކުނަށް ފުރިހަމައަށް އީމާންވުމަށްވެސް އިސްލާމީ އުއްމަތަށް ހަނދާންކޮށްދޭ ކަމަށެވެ. އަދި މުޅި ދުނިޔެއަށްވެސް ވަބާއެއްގެ ގޮތުގައި ކުރިމަތިވެފައިވާ މަސްތުވާތަކެއްޗާއި ބަނގުރަލާ ދުރުހެލިވުމަށާއި، އެފަދަ ނުބައި އެންމެހާ އަމަލުތަކުން ދުރުހެލިވެ ސާފުތާހިރު މީހެއްގެ ގޮތުގައި ދުނިޔޭގެ ދުވަސްތައް ހޭދަކުރުމަށްވެސް ހުތުބާގައި ވަނީ ނަސޭހަތްތެރިވެފަ އެވެ.
ހައްޖު ހުތުބާ އަޑުއެހުމަށް މަސްޖިދުއް ނަމީރާ ސަރަހައްދަށް ހައްޖުވެރިން ޖަމާވެ
މިއަހަރު ހައްޖުގެ އަޅުކަމުގައި ބައިވެރިވުމަށް 1.5 މިލިއަނަށްވުރެ ގިނަ ހައްޖުވެރިން ދުނިޔޭގެ އެކިކަންކޮޅުތަކުން ވަނީ މައްކާއަށް ޖަމާވެފަ އެވެ. ރާއްޖެ އިން މި އަހަރު ހައްޖުގެ އަޅުކަމަށް ދިޔަ ހުރިހާ ހައްޖުވެރިން މިހާރު ތިބީ އަރަފާތުގައި ކަމަށާއި އެ އެންމެންގެ ހާލު ރަނގަޅު ކަމަށް އިސްލާމިކް އެފެއާޒް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެ އެވެ.
