މި އަހަރުގެ މިނިވަން ދުވަހުގެ މުނާސަބަތާ ގުޅުވައިގެން އެ ޖަމިއްޔާއިން ބޭއްވުމަށް ނިންމާފައިވާ މި ހާއްސަ ނައިޓް މާކެޓާ ގުޅޭގޮތުން އެމްޓީއޭގެ ފަރާތުން "ސީއެންއެމް" އަށް ވިދާޅުވީ އެ ޖަމިއްޔާގެ ފަރާތުން އިންތިޒާމު ކުރާ މި މާކެޓަކީ ކުދި އަދި މެދުފަންތީގެ ވިޔަފާރިތަކަށް ހުޅުވާލެވިގެން މި އަހަރުގެ މިނިވަން ދުވަހުގެ މުނާސަބަތާ ދިމާކޮށް ބާއްވާ ނައިޓް މާކެޓެއް ކަމަށެވެ.
މިނިވަން އުފާ ނައިޓް މާކެޓް ބޭއްވުމުގެ މަގުސަދަކީ ވިޔަފާރިވެރިންނަށް ރަނގަޅު އަގެއްގައި މުދާ ވިއްކިފައި، މުދާ ގަންނަ ފަރާތްތަކަށް ވެސް ހެޔޮ އަގުގައި މުދާ ގަނެވޭނެ އިންތިޒާމު ހަމަޖެއްސުން ކަމަށް އެމްޓީއޭއިން ބުނެ އެވެ. އެމްޓީއޭ އުފައްދާފައި ވަނީ ވިޔަފާރިވެރިންނަށް ފުރުސަތު ފަހިކޮށްދިނުމަށްކަން ފާހަގަކޮށް އެ ޖަމިއްޔާއިން ބުނި ގޮތުގައި މި ހަރަކާތް ބާއްވަނީ ވިޔަފާރިކުރާ ފަރާތްތަކާއި ހިދުމަތް ލިބިގަންނަ ފަރާތްތަކާ ގުޅުވައިދިނުމަށް ކަމުގަ އެވެ.
މިނިވަން އުފާ ނައިޓް މާކެޓުން ސްލޮޓެއް ވިއްކުމަށް އެމްޓީއޭއިން ނިންމާފައި ވަނީ 7،500 ރުފިޔާއަށެވެ.
އެމްޓީއޭއިން މިނިވަން އުފާ ނައިޓް މާކެޓް ބާއްވާނީ އަންނަ އޮގަސްޓު މަހުގެ ފުރަތަމަ ދުވަހުން ފެށިގެން ހަތް ވަނަ ދުވަހުގެ ނިޔަލަށެވެ. މި މާކެޓް އޮންނާނީ ހުޅުމާލެ ރުއްގަނޑު ދޭއް ސަރަހައްދުގަ އެވެ.
