މަސްވެރިން ކިރުވި މަހަށް މިފްކޯއިން ފައިސާ ނުދޭތީ އައްޑޫ ސިޓީގެ ހުޅުމީދޫގައި ހުންނަ އެ ކުންފުނީގެ ފިޝަރީޒް ކޮމްޕްލެކްސްގެ މަސައްކަތް މަސްވެރިން ހުއްޓުވާފައި ވަނިކޮށް ޕީއެންސީ ހައުސް ހުޅުވަން ރޭ ބޭއްވި ޖަލްސާގައި ވާހަކަދައްކަވަމުން ޝިޔާމް ވިދާޅުވީ ރައީސް ޑރ. މުހައްމަދު މުއިއްޒު އެޑްމިނިސްޓްރޭޝަނާ ހަވާލުވެވަޑައިގެންނެވިއިރު ދައުލަތުގެ އުފެއްދުންތެރިކަމުގެ ނިސްބަތުން ދަރަނި ހުރީ 113 ބިލިއަން ރުފިޔާގައި ކަމަށެވެ. އެހެންނަމަވެސް ފައިސާ ޗާޕު ކުރުމަކާ ނުލައި އެ އަދަދު 110 ބިލިއަން ރުފިޔާއަށް ދަށްކޮށްފައިވާ ކަމަށް ޝިޔާމް ވިދާޅުވި އެވެ.
ޝިޔާމް ވިދާޅުވެފައި ވަނީ ރައީސް މުއިއްޒު އެޑްމިނިސްޓްރޭޝަނާ ހަވާލުވެވަޑައިގެންނެވިއިރު، ދައުލަތުން އެކި ފަރާތްތަކަށް ދައްކަން ޖެހޭ ނުވަ ބިލިއަނެއްހާ ރުފިޔާ އޮތް ކަމަށެވެ. އެވަރުގެ އަދަދަކާ އެކު ތެލުގެ ސަބްސިޑީ އާއި އައިސްގެ ސަބްސިޑީ ހިމަނައިގެން މިހާތަނަށް 933 މިލިއަން ރުފިޔާ މިފްކޯގެ ތެރެއިން މަސްވެރިންނަށް ދޫކޮށްފައިވާ ކަމަށް އޭނާ ވިދާޅުވި އެވެ.
މިނިސްޓަރު ވިދާޅުވި ގޮތުގައި ސަބްސިޑީގެ ގޮތުގައި ޓެކްސް ފައިސާއިން ބޮޑު އަދަދެއް މިފްކޯއަށް ދެމުން އަންނައިރު އެ ފައިސާގެ ތަފުސީލު ރައްޔިތުންނަށް އެނގެން ޖެހޭނެ ކަމުގަ އެވެ. ސަބްސިޑީގެ ގޮތުގައި ފައިސާދީގެން ނަމަވެސް އެ ފަރާތްތަކަށް ލިބެން ޖެހޭ ފައިސާ ހޯދުމަށް މަސްވެރިން ބޭނުންވާކަން ފާހަގަކުރައްވާ ޝިޔާމް ވިދާޅުވީ މަސްވެރިންނަކީ ސަބްސިޑީއަކާ ނުލައި އެ މީހުން ބާނާ މަހުން އާމްދަނީ ހޯދާ ބަޔަކަށް ވުމަށް މި އެޑްމިނިސްޓްރޭޝަނުން ބޭނުންވާ ކަމަށެވެ.
ޝިޔާމް ވިދާޅުވެފައި ވަނީ މިފްކޯ އޮތީ 1.6 ބިލިއަން ރުފިޔާއިން ދަރާފައި ކަމަށާއި އެ ކުންފުންޏަކީ އަމިއްލަ ފައި މައްޗަށް ތެދުވެ އާމްދަނީ ލިބޭ ކުންފުންޏަކަށް ހަދަން މި އެޑްމިނިސްޓްރޭޝަނުން ބޭނުންވާ ކަމަށެވެ.
ޝިޔާމް ވިދާޅުވި ގޮތުގައި އީދު ބަންދު އައިއިރު 90 މިލިއަނަށް ވުރެ ބޮޑު އަދަދެއް އޮތް މަސްވެރިންނަށް ނުދެވި އޮތް ނަމަވެސް އޭގެތެރެއިން ދެބައިކުޅައެއްބައެއްހާ ފައިސާ މަސްވެރިންނަށް ދޫކޮށްފައިވާ ކަމުގަ އެވެ. އީދު ބަންދަށްފަހު އޮފީސްތައް އަދި ހުޅުވުނީ ކަމަށާއި މަސްވެރިންނަށް ފައިސާ ދައްކާ ހަލާސް ކުރުމަކީ މި އެޑްމިނިސްޓްރޭޝަނުގެ އެޖެންޑާގެ އެންމެ ކުރީގައި އޮތް ކަމަކަށް ވުމާ އެކު މި ހަފުތާގައި އެ މަސައްކަތް ފަށާނެކަން މިނިސްޓަރު ފާހަގަކުރެއްވި އެވެ.
ޝިޔާމް ވިދާޅުވީ ހައްގު ހޯދަން ސުލްހަވެރިކަމާ އެކު އިހުތިޖާޖު ކުރެވޭނެ ކަމަށާއި އެފަދަ އިހުތިޖާޖުތަކަށް މަރުހަބާ ވެސް ކިޔާނެ ކަމަށެވެ. އެހެންނަމަވެސް މީހުންގެ ހައްގުތަކަށް އަރައިގަންނަ ކަމަށްވާ ނަމަ މި އެޑްމިނިސްޓްރޭޝަނުގައި ގާނޫނު ތަންފީޒު ކުރާނެކަން ޔަގީން ކުރާނެ ކަމަށް އޭނާ ވިދާޅުވި އެވެ.
