![](https://cnm.mv/media/images/fdfd_6.jpg)
އެމްޑީޕީގެ އަހަރީ ދުވަހާ ގުޅުވާ ރައީސް ސާލިހް މިއަދު މީޑިއާއަށް ދެއްވި އިންޓަވިއުއެއްގައި ވިދާޅުވީ އެމްޑީޕީއަށް 2028 ގައި ވެރިކަން ލިބެން އޮތީ ދަ ޑިމޮކްރެޓްސް އަލުން އެމްޑީޕީ އާ އެކުވެގެންކަމަށެވެ.
ރައީސް ސާލިހް ވިދާޅުވީ މިދިޔަ ރިޔާސީ އިންތިހާބު އެމްޑީޕީއަށް ގެއްލުނު ސަބަބަކީ އެޕާޓީން ބަޔަކު ނުކުމެގެން ދިޔުންކަމަށެވެ. އަދި ޕާޓީން ވަކިވެގެން ދިޔަ ފަރާތްތައް އަލުން ވިސްނާ އެކުގައި ގުޅިގެން މަސައްކަތް ކުރަންޖެހޭކަމަށް ރައީސް ސާލިހް ވިދާޅުވި އެވެ.
ރައީސް ސާލިހްގެ މިވާހަކަފުޅުތަކަށް ރައީސް ނަޝީދު ވަނީ ފެހި ސިގްނަލެއް ދެއްވާފަ އެވެ. ރައީސް ސާލިހް މިވާހަކަފުޅުތައް ހިމެނޭ ވީޑިއޯކޮޅެއް ހިއްސާ ކުރައްވަމުން ނަޝީދު އެކްސްގައި ކުރެއްވި ޕޯސްޓެއްގައި ވަނީ ރައީސް ސާލިހް ދެއްކެވި ވާހަކަފުޅަކީ ވަރަށް ބޮޑު ތެދެއްކަމަށް ވިދާޅުވެ އެކަމާ އެއްބަސްވެވަޑައިގެންފައެވެ.
އެމްޑީޕީ ތެރޭ ހިޔާލު ތަފާތުވުން އުފެދި ޕާޓީ ފަޅައިގެން ދިޔައީ އެމްޑީޕީގައި ރިޔާސީ ޕްރައިމެރީގައި އުފެދުނު ހިޔާލު ތަފާތުވުންތަކުގެ ތެރޭގަ އެވެ. އޭގެ ފަހުން ރައީސް ނަޝީދާއި އެމަނިކުފާނަށް ތާއީދު ކުރި މަޖިލިސް 13 މެމްބަރަކު އެމްޑީޕީން ވަކިވެ ޑިމޮކްރެޓްސް އުފެއްދި އެވެ.