ސިޓީ ކައުންސިލަށް އެމްޑީޕީ ޓިކެޓްގައި އިންތިހާބުވި، އާޒިމް މިހެން ވިދާޅުވެފައި ވަނީ، އެމްޑީޕީގެ 19 ވަނަ އަހަރީދުވަހާއި ގުޅިގެން ސޯޝަލްމީޑިއާ ކުރި ޕޯސްޓެއްގަ އެވެ.
މި ޕޯސްޓްގައި އާޒިމް ވިދާޅުވެފައި ވަނީ، އަހަރީ ދުވަހުގެ ތަހުނިޔާ އެމްޑީޕީގެ ރަންރީދޫ ބަދަހި ސަފުތަކަށް އަރިސްކުރާ ކަމަށެވެ. އަދި އަބަދުވެސް އެމްޑީޕީއަށް އެދެނީ އަދަށްވުރެ މާ ފަހި މާދަމާއެއް ކަމަށެވެ.
އެމްޑީޕީގެ 19 ވަނަ އަހަރީ ދުވަހާއި ގުޅިގެން މިއަދު ހަވީރު ދިދަ ނެގުމުގެ ރަސްމިއްޔާތެއް އެ ޕާޓީގެ އޮފީހުގައި ބޭއްވުމަށް ވަނީ ނިންމާފަ އެވެ.
ރާއްޖެއަށް މަލްޓި ޕާޓީ ނިޒާމު ތައާރަފުވެ ސިޔާސީ ޕާޓީ ރަޖިސްޓްރީކުރުމަށް ހުޅުވާލުމުން އެންމެ ފުރަތަމަ ރަޖިސްޓްރީ ކުރި ޕާޓީއަކީ އެމްޑީޕީ އެވެ. އެ ޕާޓީން ވަނީ ރާއްޖޭގެ ވެރިކަން ދެފަހަރު ކުރައްވާފަ އެވެ. އެގޮތުން، 2008 ވަނަ އަހަރުގެ ރިޔާސީ އިންތިޚާބާއި 2018ވަނަ އަހަރުގެ ރިޔާސީ އިންތިހާބު އެ ޕާޓީން ވަނީ ކާމިޔާބުކޮށްފަ އެވެ.
