ގެދޮރުވެރިޔާ ސްކޫމްގެ ދަށުން ހުޅުމާލޭގައި އިމާރާތްކުރި ފްލެޓްތައް ލިބުނު މީހުން ކަނޑައަޅާ ލިސްޓް އެ ލިސްޓުގެ ދައުރުހަމަވުމުގެ ކުރިން މިދިޔަ ސަރުކާރުން ވަނީ އިއުލާންކޮށްފައެވެ. އެހެންނަމަވެސް އެ ލިސްޓަށް ފްލެޓްތައް ދިނުން އޭސީސީން ހުއްޓުވާ ޝަރުތު ހަމަނުވާ މީހުންނަށް ފްލެޓް ދީފައިވާކަމަށް ވަނީ ބުނެފައެވެ. އަދި ލިސްޓުގައި ހިމެނޭ ޝަރުތު ހަމަވާ މީހުންނަށް ފްލެޓްތައް ދޫކުރުމަށްވެސް ގެދޮރުވެރިކަމާއި ބެހޭ ވުޒާރާއަށް އެސީސީންް ވަނީ އަންގާފައެވެ.
އެހެންނަމަވެސް މި ސަރުކާރުން ވަނީ އެ ލިސްޓުތައް އަލުން ބަލާ މުރާޖާކުރަން ނިންމާފައެވެ. އަދި މިކަމަށްޓަކައި ހާއްސަ ކޮމެޓީއެއްވެސް ވަނީ އެކުލަވާލާ އެ މަސައްކަތް ވަނީ ފަށާފައެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގައި އަޅާ 4000 ފްލެޓްތަކުގެ ތެރެއިން ބައެއް ފްލެޓްތަކުގެ މަސައްކަތް ނިމިފައި
4000 ހައުސިން ޔުނިޓްގެ މަސައްކަތް ހިނގަމުންދާ ގޮތް ބައްލަވާލެއްވުމަށް އެ މަސައްކަތް ހިނގާ ސައިޓަށް ވަޑައިގެން އެތަނުގައި ހުންނަވާ ނޫސްވެރިންނަށް މައުލޫމާތު ދެއްވަމުން ވަޒީރު ހައިދަރު ވިދާޅުވީ އެސީސީން އެ ވުޒާރާއަށްް ގިނަ ކަންތައްތަކެއް ކުރަން އަންގާފައިވާކަމަށެވެ. އަދި ފްލެޓްތައް ހަވާލުކުރާނީ މުރާޖާކޮށް ނިމުމުންކަމަށްވެސް ވަޒީރު ހައިދަރު ވިދާޅުވިއެވެ.
ހުޅުމާލެ ފޭޭސް ފޭއްގައި ހަދަމުންދާ 4000 ފްލެޓްްގެ މަސައްކަތް އެއްކޮށް ނިމޭނީ އަންނަ އަހަރުގެ މެދުތެެރޭގައިކަމަށް ގެދޮރުވެރިކަމާއި ބެހޭ ވަޒީރު ހައިދަރު ވިދާޅުވިއެވެ. ރާއްޖޭއަށް މާލީ ގޮތުން ގޮންޖެހުންތަކެއް ހުރި ނަމަވެސް ފްލެޓްތަކުގެ މަސައްކަތް ވަރަށް ބާރު ސްޕީޑްގައި ކުރިޔަށްދާކަމަށެވެ. އަދި މިހާރު ޓަވަރުތަކުގެ ކޮންކްރީޓް މަސައްކަތްތައް ނިމި ބައެއް ޓަވަރުތަކުގައި އެހެން ބައެއް މަސައްކަތްތައްވެސް ނިމިފައިވާކަން ހައިދަރު ފާހަގަކުރެއްވިއެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގައި އަޅާ 4000 ފްލެޓްތަކުގެ ތެރެއިން ބައެއް ފްލެޓްތަކުގެ ކޮންކްރީޓް މަސައްކަތް ނިމިފައި
ހުޅުމާލެ އަޅާ 4000 ފުލެޓްގެ މަސައްކަތް ކުރަނީ އިންޑިއާގެ ދެ ކުންފުންޏަކުންނެވެ. އެއީ ޖޭއެމްސީ ޕްރޮޖެކްޓްސްއާ އެންބީސީސީއެވެ. މިއިން ކޮންމެ ކުންފުންޏަކުންވެސް އަޅަނީ 2000 ފްލެޓް ހިމެނޭ ގޮތަށް 16 ޓަވެރެވެ. ކޮންމެ ޓަވަރެއްގައި 17 ބުރިއަށް ހުންނައިރު އޭގެ ތެރޭގައިހިމެނެނީ ދެ ކޮޓަރީގެ 1،200 ފްލެޓާއި ތިން ކޮޓަރީގެ 2،800 ފްލެޓްްވެ.
