އިމާރާތް ބާވެ، ހަލާކުވުމާއި ކޯޓް ރޫމްތަކަށް ވާރޭ ވެހުމުގެ ސަބަބުން ކްރިމިނަލްކޯޓުގެ ޝަރީއަތްތައް އެތައް ފަހަރަކު ހުއްޓާލަން ވަނީ ޖެހިފައެވެ.
ކްރިމިނަލްކޯޓް، ހުޅުމާލެ މެޑިކަލް ފެސިލިޓީގެ ގޮތުގައި ބޭނުންކުރެވުނު އިމާރާތަށް ބަދަލުކުރުމަށް ވަނީ ނިންމާފާއެވެ. އަދި އެކަމުގެ މަސައްކަތް އަންނަނީ ކުރަމުންނެވެ.
ޖުޑީޝަލް ސާވިސް ކޮމިޝަނުން ބުނީ އެ ކޮމިޝަންގެ ރައީސް ހުސައިން ރިޒާ އާދަމް، ކްރިމިނަލްކޯޓް ބަދަލުކުރާ އިމާރާތުގެ މަސައްކަތް ހިންގަމުންދާ ގޮތް ސައިޓަށް ޒިޔާރަތްކޮށް ބަލާފައިވާކަމަށެވެ. އަދި މި ޒިޔާރަތުގައި ކޮމިޝަންގެ ބައެއް މެމްބަރުން ބައިވެރިވިކަމަށްވެސް ޖޭއެސްސީން ބުނެއެވެ.
މިމަހުގެ 1 ވަނަދުވަހުން ފެށިގެން ކްރިމިނަލް ކޯޓުގެ ބައެއް ސެކްޝަންތައް ވަނީ ސިވިލް ކޯޓުގެ ހުޅުމާލޭ ޑިވިޝަން ހިންގަމުން އައި އިމާރާތަށް ބަދަލުކޮށްފައެވެ.
ކްރިމިނަލް ކޯޓުން ބުނި ގޮތުގައި ސިވިލް ކޯޓު ހުޅުމާލޭ ޑިވިޝަންގެ 6 މާލަން، ކްރިމިނަލް ކޯޓުގެ 11 ޤާޟީންގެ މެދުގައި އެކި ދުވަސްތަކަށް ބަހާލައިގެން ޝަރީޢަތްތައް ކުރިއަށް ގެންދިއުމަށް ހަމަޖެހިފައިވާއިރު، ދުވަސްވީ މައްސަލަތަކާއި ޝަރީޢަތް ނިމެންދެން ބަންދުގައި ތިބި މީހުންގެ މައްސަލަތަކުގެ ޝަރީޢަތްތައް ކުރިއަށް ގެންދިއުމަށް އިސްކަންދޭން އެ ކޯޓުންވަނީ ނިންމާފައެވެ.
މިދިޔަ އަހަރުގެ ފެބްރުއަރީ މަހުގެ 22 ވަނަ ދުވަހުން ފެށިގެން ކްރިނިނަލް ކޯޓުގެ އިމާރާތުން ބައެއް ބޭނުންނުކުރަން ޖޭއެސްސީ އިން އެންގުމާއި ގުޅިގެން، އަދި އޭގެ ފަހުން ކޯޓުގެ އިމާރާތަށް ފެން ފައިބާ ކަރަންޓު ނިޒާމަށް ފެނުގެ އަސަރުކުރުމުގެ ސަބަބުން، ކޯޓުގެ ޝަރީޢަތްތައް ކުރިއަށް ގެންގޮސްފައިވަނީ އެއް ޝަރީއަތުގެ މާލަމުގައެވެ.
