ޑރ. ޝަހީމް މިހެން ވިދާޅުވީ ރޭ ފެށި ގައުމީ ގުރުއާން ކިޔެވުމުގެ މުބާރާތް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ޝަހީމް ވިދާޅުވީ ގުރުއާން ހިތު ދަސްކުރުމަކީ ބުރަ އަދި މާތް މަސައްކަތެއްކަމަށެވެ. އެހެންކަމުން އެ މަސައްކަތް ކުރާ ދަރިވަރުންނަށްް ހިތްވަރު ދިނުމަށް ސަރުކާރުން ޕޮކެޓް މަނީއެއް ދިނުމަށްް ނިންމާފައިވާކަމަށެވެ. އަދި އަންނަ އަހަރުން ފެށިގެން މިކަން ފަށާނެކަން ޑރ. ޝަހީމް ފާހަގަކުރެއްވިއެވެ.
ކީރިތި ޤުރުއާނާއި ބެހޭ މަރުކަޒު ހިންގުމަށް މި ސަރުކާރުގައި ހާއްސަ ބިނާއެއް ގާއިމުކުރަން ނިންމާފައިވާކަންވެސް ޝަހީމް ރޭ ވަނީ އިއުލާންކުރައްވާފައެވެ. ކީރިތި ގުރުއާނާއި ބެހޭ މަރުކަޒު މިހާރު ހިންގަމުން އަންނަނީ ސަލްމާން މިސްކިތުގައެވެ. އެހެންކަމުން އެ މަރުކަޒު ހިންގުމަށް ވަކި ބިނާއެއް ހެދުމަށް ރައީސް ޑރ. މުއިއްޒާއި މަޝްވަރާކުރައްވާނެކަމަށް ޝަހީމް ވިދާޅުވިއެވެ.
ގުރުއާން ކިޔެވުމުގެ ގައުމީ މުބާރާތުގައި މިއަހަރު 119 މުއައްސަސާއަކުން 1029 ބައިވެރިން ވާދަކުރެ އެވެ.
މިއަހަރުގެ މުބާރާތް ހުޅުވާލާފައި ވަނީ އަތޮޅު ކައުންސިލްތަކަށާއި، ސިޓީ ކައުންސިލްތަކަށާއި ގުރްއާން ކުލާސްތަކުގެ އިތުރުން ހާފިޒުންނަށް ބައިވެރިވެވޭ ގޮތަށެވެ. އެގޮތުން މިފަހަރުގެ ބައިވެރިންގެ ތެރޭގައި ހިމެނެނީ 52 ސްކޫލުން 365 ދަރިވަރުންނާއި، ކައުންސިލްތަކުގެ ފަރާތުން ވާދަކުރާ 357 ބައިވެރިންގެ އިތުރުން އެހެނިހެން މުއައްސަސާތަކުގެ 292 ބައިވެރިންނެވެ. އަދި މިއަހަރުގެ މުބާރާތުގައި ހާފިޒުންގެ ބައިން 15 ބައިވެރިން ވާދަކުރެ އެވެ.
