ފުލުހުން ތަރުޖަމާނު އެސިސްޓަންޓް ކޮމިޝަނާ އޮފް ޕޮލިސް، އަހުމަދު ޝިފާން ވިދާޅުވީ ބަނގުރާކަމަށް ޝައްކު ކުރެވޭ 150 ފުޅިއާއި އެކު އެ ދެމީހުން ހައްޔަރުކުރީ ހުޅުމާލެެއިން ކަމަށެވެ. އަދި މި ދެމީހުންގެ އަތުން ގިނަ އަދަދެއްގެ ފައިސާވެސް އަތުލައިގެންކަމަށެވެ.
މި މީހުންގެ ވަނަވަރު ޝިފާން ހާމަކުރައްވާފައެއް ނުވެއެެވެ. އެހެންނަމަވެސް އެމީހުން އަތުން އަތުލައިގެންކަމަށް ބުނާ ބަނގުރާތައް ފެންނަ ފޮޓޯއެއް ޝިފާން ވަނީ އޭނާގެ އެކްސްގައި ހިއްސާކޮށްފައެވެ. ފޮޓޯއިން ފެންނަ ގޮތުން މި ބަނގުރާތައް އަޅާފައި ހުރީ ފެން ހުސްކުރި ޕްލާސްޓިކް ކުދި ފުޅުތަކަކަށެވެ. އަދި އެ އެއްޗެހި ރައްކާކޮށްފައި ހުރީ ކަރުދާސް ފޮށިތަކެެއްގައެވެ.
މި ސަރުކާރު ވެރިކަމަށް އައިފަހުން މިދިޔަ މޭމަހުގެ ނިޔަލަށް 104 މިލިއަނަށްވުރެ ގިނަ ޑްރަގްސް އަތުލައިގެންފައިވާކަމަށް ދިވެހި ފުލުހުންގެ ހިދުމަތުން ވަނީ ބުނެފައެވެ.
ފުުލުހުން ބުނެފައިވަނީ މަސްތުވާތަކެތީގެ އޮޕަރޭޝަންތަކުގައި 3600 ވުރެ ގިނަ މީހުން ބަލާ ފާސްކޮށްފައިވާކަމަށެވެ. އަދި 13 އުޅަނދެއް ހުއްޓުވާ ބަލާ ފާސްކޮށް ބައެއް އުޅަނދުތައް ޓޯކޮށްފައިވާކަމަށެވެ. މަސްތުވާތަކެއްޗާއި ގުޅުން ހުރި 257 މައްސަލައެއް ތަހުގީގުކޮށް އޭގެތެެރެއިން 95 މީހަކަށް ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް މިއަހަރުގެ މިހާތަނަށް ފޮނުވާފައިވާކަމަށްވެސް ފުލުހުން ބުނެއެވެ.
