ގާސިމް މިހެން ވިދާޅުވީ ރައްޔިތުންގެ މަޖިލީހުގެ މެންބަރުންގެ ޢަދަދު ކޮންމެ 5 އަހަރަކުން އިތުރުވަމުންދާ ދިއުމާމެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ހުށައެޅި ޤަރާރުގެ ބަހުސް ގައި ވާހަކަ ދައްކަވަމުންނެވެ. މި ގަރާރު މަޖިލީހަށް ހުށައެޅުއްވީ ބާރަށޫ ދާއިރާގެ މެމްބަރު އިބްރާހިމް ޝުޖާއުއެވެ.
މި ގަރާރުގެ ބަހުސްކުރައްވަމުން ގާސިމް ވިދާޅުވީ ރައްޔިތުން މަޖިލީހުގެ މެމްބަރުން ދައުރު ލިމިޓްކުރުމަށާއި މުސާރައާއި އިނާޔަޔްތައް ކުޑަކުރަން ދެކޮޅުކަމަށެވެ. ގާސިމް ވިދާޅުވީ މަޖިލިހަށް ހޮވިވަޑައިގެން މާލެއަށް އަންނަ މެމްބަރުންނަށް މިހާރު މަޖިލީހުން ކަނޑައަޅާފައި ލިވިން އެލަވަންސުން ނުފުދޭކަން އެނގޭކަމަށެވެ. އަދި މަޖިލީހުގެ މެމްބަރުން ފަސް އަހަރު ހަ އަހަރު ކުރިޔަސް ދައުރު އެއްވެސް ތަނެއްގައި ލިމިޓްކޮށްފައި އޮތްވާ ނުދެކޭކަމަށެވެ.
ގާސިމް ވިދާޅުވީ މަޖިލީހުގެ މެމްބަރުންގެ އަދަދު ކަނޑައަޅާއިރު ދާއިރާގެ އާބާދީގެ އަދަދަށް ކަނޑަނާޅާ ވަކި އަދަދަކަށް ދާއިރާ ކަނޑައަޅާ މެމްބަރުންގެ އަދަދެއް ކަނޑައެޅުން މުހިއްމުކަމަށެވެ.
ގާސިމް ވަނީ އާސަންދަ ފަދަ އިނާޔަޔްތައް ހައްގުވާ މީހުންނަށް އެކަނި ދޭން ވާހަކަ ދައްކާތީ އެކަމާއި ދެކޮޅަށް ނުރުހުން ފާޅުކޮށްފައެވެ. ގާސިމް ވިދާޅުވީ ދައުލަތަށް އެންމެ ގިނައިން ޓެކްސް ދައްކާ މީހާއަށް ދައުލަތުން ދޭ އިނާޔާތްތައް ހައްގުނުވޭތޯ ސުވާލު އުފައްދަވާފައެވެ.
ގާސިމްގެ އިތުރުން މިއަދު މަޖލީހުގައި ވާހަކަ ދެއްކެވި ގިނަ މެމްބަރުންތަކެއް ވަނީ މަޖިލީހުގެ މެމްބަރުންގެ މުސާރަ ކުޑަކަމަށް ވަކާލާތުކޮށްފައެވެ.
