ޝުޖާއު މިހެން ވިދާޅުވީ ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމެޓީގައި ހިތަދޫ މެދު ދާއިރާގެ މެންބަރު އަހުމަދު އަޒާން މަރުޒޫގު ކުރެއްވި ސުވާލަކަށް ޖަވާބު ދެއްވަމުންނެވެ.
ކަމާ ގުޅުން ހުރި ފަރާތްތަކާ އެކު، ހަދަމުން އަންނަ އޮޑިޓް ނިމުމުން އިތުރު ތަފްސީލް ހާމަކުރެވޭނެ ކަމަށް ޝުޖާއު ވިދާޅުވި އެވެ.
މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި އެ މައްސަލައާ ގުޅޭ ގޮތުން ހޯމް މިނިސްޓަރު އަލީ އިހުސާން ވިދާޅުވި ރަށްތަކުގައި 61 ޕޮލިސް ސްޓޭޝަނެއް އަޅައި، 41.18 ޔޫއެސް ޑޮލަރުގެ މަޝްރޫއެއް ރާއްޖޭގައި ހިންގުމަށް އިންދިރާ ޕްރޮޖެކްޓްސް ކިޔާ އިންޑިއާގެ ކުންފުންޏަކުން 2019 ވަނަ އަހަރުގެ އޮގަސްޓު މަހު ޝައުގުވެރިކަން ފާޅުކުރި ކަމަށެވެ.
ދިވެހި ސަރުކާރުން އެ ކުންފުންޏަށް ފައިސާ ދެއްކުމަށް ފަހުގައި ވެސް ފުލުސް ސްޓޭޝަންތައް އެޅުމުގެ އަމަލީ އެއްވެސް މަސައްކަތެއް ކުރިއަށް ގެންގޮސްފައި ނުވާ ކަން ފާހަގަކުރައްވައި އިހުސާން ވިދާޅުވީ އެކަން އެހެން އޮއްވައި 23 އޭޕްރިލް 2023 ގައި އެ ޕްރޮޖްކްޓު ހިންގުމަށް އިންޑިއާގެ އެގްޒިމް ބޭންކުން ދޭގޮތަށް ހަމަޖެހިފައި އޮތް ލޯނު ފައިސާ ނުދޭން މިހާރު ނިންމާފައިވާ ކަމަށް އިންދިރާ ޕްރޮޖެކްޓްސް އިން ރާއްޖެއަށް އަންގާފައިވާ ކަމަށެވެ.
އެފަހުން ކުރެވުނު އެއްވެސް މުއާމަލާތެއްގެ އަލީގައި ދިވެހި ސަރުކާރުން އިންދިރާ ޕްރޮޖެކްޓްސްއަށް ދިން ފައިސާއަށް ވީގޮތެއް ވެސް އަދި ސާފު ނުވާކަމަށާއި އެ ޕްރޮޖެކްޓު ވެސް އެއްވެސް ވަރަކަށް ކުރިއަށް ނުދާ ކަމަށް އިހުސާން ވިދާޅުވި އެވެ.
ހޯމް މިނިސްޓްރީގައި ހުރި ލިޔުންތަކާ ހަވާލާދެއްވައި، އިހުސާން ވިދާޅުވީ އެ ޕްރޮޖެކްޓްގައި ސޮއިކޮށްފައި ވަނީ 85 ޕަސެންޓް އިންޑިއާގެ އެގްޒިމް ބޭންކުން ދައްކައި ބާކީ 15 ޕަސެންޓް ދިވެހި ސަރުކާރުން ދައްކާ ގޮތަށެވެ.
އެކަމަކު، އެ ލޯނު ހަމަޖައްސައި ދެވެން ނެތް ކަމަށް އެގްޒިމް ބޭންކުން އަންގާފައިވާއިރު، ދިވެހި ސަރުކާރުން އެޑްވާންސް ފައިސާ މާ ކުރިން އެ ކުންފުންޏަށް ދައްކާފައިވާކަން ރެކޯޑުތަކުން ފެންނަން އޮތް ކަމަށް އިހުސާން ވިދާޅުވި އެވެ.
އިހުސާން ވިދާޅުވީ އެ މަސައްކަތުގެ ތަފުސީލުތައް ބަލަން ޖެހުނީ ރައީސް ޑރ. މުހައްމަދު މުއިއްޒު މިހާރު އަތޮޅުތަކަށް ކުރައްވަމުން ގެންދަވާ ކެމްޕޭނު ދަތުރުތަކުގައި ބައްދަލުވާ ކައުންސިލުތަކުންނާއި ރައްޔިތުންގެ ފަރާތުން އެ ފުލުސް ސްޓޭޝަންތަކުގެ ޝަކުވާ އަންނާތީ ކަމަށެވެ.
