މިއަދު މެންދުރުފަހުގެ ވަގުތެއްގައި އަލިފާން ރޯވީ މ.އެންޒިއަންގޭގެ 3 ވަނަ ފަންގިފިލާގައެވެ. އަލިފާން ރޯވެ އެރި ދުމުގެ އަސަރުކޮށްގެން 4 މީހަކަށް އަންނަނީ ހޮސްޕިޓަލްގައި ފަރުވާދެމުންނެވެ.
އެ އެޕާޓްމަންޓްގައި ރޯވިތާ މާގިނައިރުތަކެއް ނުވަނީސް އެމްއެންޑީއެފްގެ ފަޔާ ފައިޓަރުން ވަނީ އަލިފާން ނިންވާލާފައެވެ. އެހެންނަމަވެސް އެ އެޕާޓްމަންޓްގައި ހުރި ގިނަ އަދަދެއްގެ ތަކެއްޗަށް ވަނީ އަނދާ ހުލިވެފައެވެ. އަދި އެޕާޓްމަންޓް އަލުން ހަދައިގެން ނޫނީ ދިރިނޫޅެވޭ ވަރަށް އަނދައިފިއެވެ.
މ.އެންޒިއަންގޭގެ 3 ވަނަ ފަންގިފިލާގައި ހިނގި އަލިފާނުގެ ހާދިސާގައި ގޭގައި ގެންގުޅޭ ތަކެތި އަނދާފައި
ފަޔަރު ޓީމުން އާއްމުކޮށްފައިވާ ފޮޓޯތަަކަށް ބަލާއިރު އެ ގޭގައި ހުރި ހުރިހާ ފަރުނީޗަރުތަކެއް ވަނީ ހަލާކުވެފައެވެ. އަދި ހިފާ ގެންގުޅޭ ސާމާނުތައް ވަނީ އެއްކޮށް ހަލާކުވެފައެވެ.
މ.އެންޒިއަންގޭގެ 3 ވަނަ ފަންގިފިލާގައި ހިނގި އަލިފާނުގެ ހާދިސާގައި ގޭގައި ގެންގުޅޭ ތަކެތި އަނދާފައި
އެ އެޕާޓްމަންޓްގައި ދިރިއުޅެމުން ދިޔަ އާއިލާއަށް އެހީތެރިކަން ފޯރުކޮށްދިނުމަށް ނެޝަނަލް ޑިޒާސްޓާ މެނޭޖމަންޓް އޮތޯރިޓީން އަންނަނީ މަސައްކަތް ކުރަމުންނެވެ. އެ އޮތޯރިޓީން ބުނީ މ. އެންޒިއަން ގޭގެ 3 ބީ ގައި މިއަދު ހިނގި އަލިފާނުގެ ހާދިސާގައި ދިރިނޫޅެވޭވަރަށް އެތަނަށް ގެއްލުން ލިބިފައިވާކަމަށެވެ. އަދި ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށް ދިނުމުގެ މަސައްކަތް އަންނަކަމަށް އެ އޮތޯރިޓީން ބުނެއެވެ.
