މިނިސްޓަރ ޝިޔާމް މިހެން ވިދާޅުވީ، ދުނިޔޭގެ ކާބޯތަކެއްޗާއި ބެހޭ ޖަމްއިއްޔާ (އެފްއޭއޯ) ގެ މަސްވެރިކަމާބެހޭ ކޮމިޓީގެ 36 ވަނަ ޖަލްސާ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރާއްޖެ ފަދަ ކުދި އަދި ތަރައްގީވަމުން އަންނަ ގައުމުތަކަށް މަސްވެރި ސިނާއަތުގައި ވިޔަފާރި ކުރުމަށް ހުރި ހުރަސްތަކަށް ވެސް މިނިސްޓަރ ވަނީ އަލިއަޅުއްވާލައްވާފަ އެވެ. އެގޮތުން އެންމެ ބޮޑު އެއް ކަންބޮޑުވުމެއްގެ ގޮތުގައި ފާހަގަކުރެއްވީ ބައިނަލްއަގްވާމީ މާކެޓަށް މަހުގެ ބާވަތްތައް ނެރުމުގައި ކުރަންޖެހޭ ހަރަދުތައް ބޮޑުވުން ކަމަށެވެ.
މިނިސްޓަރ ވިދާޅުވީ، މަސް ބޭރުކުރުމަށް ރާއްޖެއިން ބޮޑު ޓެކްސްއެއް ދައްކަންޖެހޭ ކަމަށާއި، މި ކަމުގެ ސަބަބުން މަސް ޕްރޮސެސްކުރުމަށް ރާއްޖެއިން ރޯ ގަނޑުކުރި ކަޅުބިލަ މަސް ދުނިޔޭގެ ބާޒާރަށް ނެރެން މަޖުބޫރުވެފައިވާ ކަމަށެވެ.
މީގެ އިތުރުން، މިނިސްޓްރީގެ މެންޑޭޓަށް ގެނެވުނު ބަދަލާއިއެކު އޯޝަން ރިސޯސަސް ގާނޫނެއް ޑްރާފްޓްކުރުމަށް ބޭނުންވާ ތަޖްރިބާކާރުންގެ އެހީތެރިކަން ފޯރުކޮށްދިނުމަށްވެސް އެއްބަސްވެވުނެވެ. މިކަމާއި ގުޅޭގޮތުން ފުރިހަމަ ކުރަންޖެހޭ އިދާރީ ކަންކަން ކުރިއަށް ގެންދިއުމަށް އެއްބަސްވެވުނެވެ.
