ފިހާރަތަކުން ކަނޑުމަހުގެ ބާވަތްތައް ހުސްވެފައި ވާތީ އާންމުންގެ ގިނަ ބަޔަކު ދަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ.
އެކަމާ ގުޅޭ ގޮތުން މިފްކޯ އިން މިއަދު ބުނީ އެ ކުންފުނީގެ ފިހާރަތަކުން ކަނޑުމަހުގެ ބާވަތްތައް ހުސްވެފައިވަނީ މި ދުވަސްވަރަކީ ރާއްޖޭގައި މަސްވެރިކަން ދަށް އަދި ކިރާ މަހުގެ އަދަދުވެސް ދަށް ދުވަސްވަރަކަށްވާތީ ކަމަށެވެ.
އަންނަ އޯގަސްޓް މަހުގެ ތެރޭގައި ރާއްޖޭގައި މަސްވެރިކަން ރަނގަޅުވާނެ ކަމަށް މިފްކޯއިން ލަފާކުރެ އެވެ. ބައެއް ރަށްރަށުގެ މަސްދޯނިތަކުން ކަނޑުމަހަށް ނުދާތާ މިހާރު މަހަކަށް ވުރެ ގިނަ ދުވަސް ވެއްޖެ ކަމަށް ވެސް ބައެއް މަސްވެރިން ބުންޏެވެ.
ކަނޑުމަހުގެ ބާވަތްތައް ލިބުން ދަތިވެފައިވާއިރު މަސް ކުންފުނިތަކަށް މި އަހަރުގެ ފުރަތަމަ ފަސް މަސް ދުވަހުގެ ތެރޭގައި ކިރާފައިވާ މަހުގެ އަދަދު މިދިޔަ އަހަރުގެ މި މުއްދަތާ އަޅާބަލާއިރު 39 ޕަސެންޓް ދަށަށް ގޮސްފައިވާ ކަމަށް މަރުކަޒީ ބޭންކް -- (އެމްއެމްއޭ) ގެ ތަފާސްހިސާބުތަކުން ދައްކަ އެވެ.
