ވިލިނގިލި ފެރީ ޓާމިނަލް ގައި މަޑުކުރަން ތިބޭތަނާއި ފެރީތައްވެސް ފުރި ބާރުވާ ވަރަށް މީހުން އަރުވާކަމަށާއި އިޖުތިމާއީ ގައިދުރުކަމާއި އެއްގޮތަށް ކަންނުކުރެވޭ ކަމަށް ބުނެ މީހުން ދަނީ ކަންބޮޑުވުން ފާޅުކުރަމުންނެވެ.

އެމްޓީސީސީގެ ޓްރާންސްޕޯޓް ޑިޕާޓްމަންޓްގެ ޖެނެރަލް މެނޭޖަރު މުހައްމަދު ނާޒިމް ސީއެންއެމްއަށް ވާހަކަދައްކަމުން މިއަދު ވިދާޅުވީ ފެރީތަކާއި ފެރީ ޓާމިނަލް ފުރިބާރު ވަނީ ހަމައެކަނި ހަވީރު ގަޑީގައި ކަމަށެވެ. 

ހަވީރު 03:55 އަކުން 04:20 އާ ދޭތެރޭ ކޮންމެ ފަސް މިނެޓަކުން ވިލިނގިލި ފެރީ އޮވެއެވެ. އޭގެ ކުރީ ގަޑިތަކުގައި ކޮންމެ ދިހަ މިނެޓަކުން ފެރީ އޮވެއެވެ.

ހަވީރު ކާފިޔު ހިންގަން ފެށިފަހުން އެމްޓީސީސީ އިން ދިޔައީ ފަހެއް ޖެހުމުގެ ބައިގަޑިއިރު ކުރިން ހިދުމަތް މެދުކަނޑާލަމުންނެވެ. ނަމަވެސް މިއަދުން ފެށިގެން ހިދުމަތް ހުއްޓާލާނީ ހަވީރު 4:20 ގައި ކަމަށް އެކުންފުނިން ޝާއިއު ކޮށްފައިވާ ތާވަލުގައި ވެއެވެ. 

ނާޒިމް ވިދާޅުވި ގޮތުގައި މިބަދަލު ގެނެސްފައި ވަނީވެސް ފަހެއް ޖެހުމުގެ ކުރިން ގެއަށް ދެވޭނެކަން ޔަގީންކުރުމަށެވެ.

"ފެރީ ކުރިން އޮތްގޮތުންވެސް 4:38 އަކަށް ވިލިނގިލި އަށް ދެވޭނެ. އަދި ހިނގާފައި ދިޔަނަމަވެސް ފަހެއް ޖެހުމުގެ ކުރިން ގެއަށް ދެވޭނެ. އެކަމަކުވެސް ބައެއް މީހުން ބޭރުގަ އުޅޭ ސަބަބެއް ކަމަށް ފެރީ ލަސްވުން ދައްކާތީ މިބަދަލު ގެނައީ. މިހާރު 4:30 ވުމުގެ ކުރިން ހުންނާނީ ވިލިނގިލީގައި." ނާޒިމް ވިދާޅުވި އެވެ.

މީގެ އިތުރަށް ނާޒިމް ވިދާޅުވީ އެޗްޕީއޭގެ އެންގުމަށް ބޯލަނބައި ވީހާވެސް ވަރަކުން ގޭގައި މަޑުކުރަންޖެހޭ ކަމަށެވެ. އަދި ކޮންމެ މީހަކުވެސް ފަރުދީ ޒިންމާ އަދާކުރަން ޖެހޭކަމަށާއި ކޮންމެހެން ޒަރޫރީ ބޭނުމަކު ނޫނީ ދަތުރު ނުކުރުން މުހިއްމުކަމަށް ނާޒިމް ވިދާޅުވިއެވެ.