ހާފިޒުންނަށް ކޮންމެ އަހަރަކު ރައީސް ދެއްވާ ހާއްސަ އެވޯޑެއްގެ ގޮތުގައި "ރަން ތާޖު" ހަފްލާ ގައުމީ ފެންވަރުގެ ބާއްވަން ނިންމިކަން ސަރުކާރުން ރޭ ވަނީ އިއުލާންކޮށްފައެވެ.
މިކަމާއި ގުޅުވާ އިސްލާމިކް މިނިސްޓަރު ޑރ. ޝަހީމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ހާފިޒުން ދަސްވެނިވާ އިރު ލާ ގައުން ޑިޒައިން އަންނަ ހަފްތާގައި އިއުލާންކުރާނެކަމަށެވެ. އަދި މި ގައުންއިން އިސްލާމީ ސަޤާފަތާއި ޢިލްމާއި ހަޟާރަތުގެ ރަމްޒުވާނެކަމަށްވެސް މިނިސްޓަރު ވިދަޅުވިއެވެ.
ކީރިތި ގުރްއާން ހިތުދަސްކޮށް ހާފިޒުކަމުގެ ސަނަދު ހާސިލުކުރާ ފަރާތްތަކަށް ރަންތާޖާއި، އެކަމުގެ ލިޔުން މިހާތަނަށް ހަވާލުކުރަމުން ދިޔައީ ކީރިތި ގުރްއާން ކިޔެވުމުގެ ގައުމީ މުބާރާތުގެ ނަތީޖާ ފާޅުކުރަމަށް ބާއްވާ ރަސްމިއްޔާތުގެ ތެރެއިންނެވެ.
ކީރިތި ގުރްއާން ކިޔެވުމުގެ 36 ވަނަ ގައުމީ މުބާރާތުގެ ނަތީޖާ ފާޅުކުރުމަށް ރޭ ބޭއްވި ރަސްމިއްޔާތުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ސަރުކާރުން ގަސްދުކުރަނީ އަންނަ އަހަރުން ފެށިގެން ހާފިޒުން ދަސްވެނިވާ ހަފްލާއަކީ ކީރިތި ގުރުއާން ކިޔެވުމުގެ ގައުމީ މުބާރާތް ނިންމުމުގެ ހަފްލާއާއި ވަކިން ބޭއްވޭ ގައުމީ ފެންވަރުގެ ބޮޑު ހަފްލާއަކަށް ހަދަން ކަމަށެވެ.
