އެޗްޑީސީން މިއަދު އެކްސްގައި ކުރި ޕޯސްޓެއްގައި ބުނީ މިއަދު ކުރިއަށް ގެންދިޔަ އެމްޓީޑީސީގެ އާ އޮފީހުގެ ބިންގާ އެޅުމުގެ ރަސްމިޔާތުގައި އެ ކޯޕޮރޭޝަންގެ މެނޭޖިން ޑިރެކްޓަރު އިބްރާހީމް ފަޒުލް ބައިވެރިވަޑައިގެންފައިވާކަމަށެވެ.
މިއަދު ކުރިއަށް ގެންދެވުނު މަސައްކަތާއެކު އެމްޓީޑީސީގެ ތަރައްގީއަށް އިތުރު ހަރުފަތަކަށް ގެންދެވުނު ކަމަށް އެޗްޑީސީން ފާހަގަކުރެ އެވެ.
މޯލްޑްޑިވްސް ޓޫރިޒަމް ޑިވެލޮޕްމަންޓް ކޯޕޮރޭޝަން އުފެދިގެން ދިޔައީ 2006 ވަަނަ އަހަރުގަ އެވެ.
އެމްޓީޑީސީން ދެކޭ ތަސައްވަރަކީ ފަތުރުވެރިކަމުގެ ސިނާއަތުގެ މެކްރޯ އަދި މައިކްރޯ އިގްތިސާދީ ގާބިލްކަން އިތުރުކުރުމަށް ހިއްސާދާރުންނާއި ސްޓޭކްހޯލްޑަރުންގެ އުންމީދުތައް ހާސިލްކުރުމަށް މައިގަނޑު ގާބިލްކަމާއި މާލީ ބާރު ބޭނުންކޮށްގެން ރާއްޖޭގެ އެންމެ ވަރުގަދަ އެއް ޕަބްލިކް ލިމިޓެޑް ކުންފުންޏަކަށް ވުމެވެ.
މީގެ އިތުރުން އެމްޓީޑީސީގެ މިޝަން އަކީ ތަފާތު އިންވެސްޓްމަންޓްތައް ހޯދައި، އިންވެސްޓްމަންޓުން އެންމެ ބޮޑު އާމްދަނީއެއް ލިބޭތޯ ބެލުމާއި، އެ އިންވެސްޓްމަންޓުން ހިއްސާދާރުންގެ މުއްސަނދިކަން އެންމެ ބޮޑުވާނެ ގޮތަށް ވަސީލަތްތައް ރަނގަޅަށް ބޭނުންކުރުން ކަމުގައި އެ ކޯޕޮރޭޝަން އިން ބުނެ އެވެ.
