ދައުވާކުރަނީ އެމްއެމްޕީއާރުސީގެ ހިޔާނާތުގައި ދައުލަތަށް ގެއްލުނު ފައިސާ އަނބުރާ ހޯދަން ކުރާ ދައުވާތަކެކެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި އެންޓި ކޮރަޕްޝަންގެ ކޮމިޝަން (އޭސީސީ) ބުނީ އެމްއެމްޕީއާރުސީގެ ހިޔާނާތާ ގުޅޭ 115 މައްސަލައެއްގެ ތަހުގީގު ނިންމައި 640 މިލިއަން ރުފިޔާ ދައުލަތަށް އަނބުރާ ހޯދަން އަންގާފައިވާކަމަށެވެ. އެހެންނަމަވެސް އެ މައްސަލަތަކުގައި މިހާތަނަށް ދައުވާކޮށްފައި ނުވާކަމަށް އޭސީސީން އިއްޔެ ވަނީ ބުނެފައެވެ.
މި މައްސަލަތަކުގެ ތެރެއިން 7 މައްސަލައެއްގައި މިމަހު ދައުވާކުރާނެކަމަށް ބަންޑާރަ ނައިބު އަހްމަދު އުޝާމް ވިދާޅުވިއެވެ. އަދި މައްސަލަތަކުގައި ދައުވާނުކޮށް އޮތީ މިދިޔަ ސަރުކާރުގައި ބަންޑާރަ ނައިބުގެ އޮފީހާއި އެމްއެމްޕީއާރުސީ ދެމެދު އެއްބަސްވުމަކަށް ނާދެވިގެންކަމަށެވެ.
ބަންޑާރަ ނައިބު ވިދާޅުވީ އުޝާމް ވިދާޅުވީ އެމްއެމްޕީއާރުސީން އެ ދައުވާތައް އުފުލުމަށް ބަންޑާރަ ނައިބުގެ އޮފީހުގައި އެދުނުނަމަވެސް އެ ދައުވާތައް އުފުލުމުގެ ހައިސިއްޔަތު ދައުލަތަށް ނެތްކަމަށް އަންގާފައިވާކަމަށެވެ. އުޝާމް ވިދާޅުވީ އެ ދައުވާތައް އެމްއެމްޕީއާރުސީން އުފުލަންޖެހޭކަމަށާއި އެކަން އެގޮތަށް ކުރުމަށް އެ އޮފީހަށް ލަފާދީފައިވާކަމަށެވެ.
ރާއްޖޭގެ ފަހުގެ ތާރީހުގައި ހިންގި އެންމެ ބޮޑު ހިޔާނާތް އެމްއެމްޕީއާރުސީގެ ހިޔާނާތް ހިންގާފައިވަނީ ރައީސް ޔާމީންގެ ވެރިކަމުގައެވެ. އެކަމުގެ މައުލޫމާތު ލިބިގެން އެވާހަކަތައް އޭރު އޮޑިޓަރ ޖެނެރަލް އިބްރާހިމް ނިޔާޒު ރައީސް ޔާމީންނަށް އެންގެވުމުން އެކަމާއި އެމަނިކުފާނު އަޅާ ނުލެއްވިކަމަށް އޭރުގެ އޮޑިޓަރ ޖެނެރަލް ވަނީ ވިދާޅުވެފައެވެ.
އެމްއެމްޕީއާރުސީން އެތައް ބިލިއަން ދިވެހި ރުފިޔާއަކަށް ހިޔާނާތްތެރިވިކަން އެނގުނީ ރައީސް ޔާމީނާ އޭރުގެ އެންމެ އަރިސްކޮށް އުޅުއްވި ނައިބް ރައީސް އަހްމަދު އަދީބާ ދެ ބޭފުޅުން މައްސަލަ ޖެހުނު ހިސާބުންނެވެ. އޭގެކުރިން އެކަމާއި ގުޅިގެން ދެއްކި އެއްވެސް ވާހަކައަކަށް ރައީސް ޔާމީން ފިޔަވަޅު އަޅުއްވާފައެއް ނުވެއެވެ.
