ސީވީއެފްގެ ފަރާތުން އެމްއޯޔޫ ގައި ސޮއި ކުރީ އެ ފޯރަމްގެ ސެކްރެޓަރީ ޖެނެރަލް އަދި ކުރީގެ ރައީސް މުހައްމަދު ނަޝީދެ އެވެ. އަދި ދިލްމާ ޓީގެ ފަރާތުން އެ އެމްއޯޔޫ ގައި ސޮއި ކުރެއްވީ އެކުންފުނީގެ ޗީފް އެގްޒެކެޓިވް އޮފިސަރު (ސިއީއޯ) ދިލްހާން ސީ ފާނޭންޑޯ އެވެ.
ނަޝީދުގެ ރަސްމީ އެކްސް އެކައުންޓް މެދުވެރިކޮށް ކުރި ޕޯސްޓެއްގައި އެ މަނިކުފާނު ވިދާޅުވީ މިއަދު އެ އެމްއޯޔޫ ގައި ސޮއި ކުރަން ލިބުމަކީ ޝަރަފެއްކަަމަށެވެ. އަދި އެ އެމްއޯޔޫ ގައި ސޮއި ކުރުމުގެ ބޭނުމަކީ ސައި އުފެއްދުމުން "ޖީއެޗްޖީ" ނުވަތަ ދުނިޔޭގެ ޖައްވުގައި ހޫނު ހިފަހައްޓާ ގޭސްތައް ދޫކުރާ މިންވަރު މަދުކުރުމަށާއި ބަޔޯޑައިވާސިޓީ އަލުން އާލާކުރުމަށް އެހީތެރިވުންކަމަށް ނަޝީދު އެ ޕޯސްޓްގައި ވިދާޅުވި އެވެ.
އެ ޕޯސްޓްގައި ނަޝީދު އިތުރަށް ވިދާޅުވީ މިއީ ސްރީލަންކާގެ ކްލައިމެޓް ޕްރޮސްޕެރިޓީ ޕްލޭންގެ ބޮޑު އިސްނެގުމެެއްކަމަށެވެ.
ސީވީއެފްއަކީ ރައީސް ނަޝީދު އަދި ދިވެހިރާއްޖެއިން އިސްވެ 2009 ވަނަ އަހަރު އުފެއްދި ބައިނަލްއަގްވާމީ ޖަމިއްޔާއެކެވެ. އެ ޖަމިއްޔާގެ އެންމެ ފުރަތަމަ ބައްދަލުވުން ބޭއްވީ ނޮވެމްބަރު، 2009، ގައި ރާއްޖޭގައެވެ. އެއިރު ޖަމިއްޔާގެ މެމްބަރު ގައުމުތަކުގެ އަދަދަކީ 10 އެވެ.
ސީވީއެފްގައި މިހާރު 58 މެމްބަރު ގައުމު ހިމެނޭއިރު އޭގެ ތެރޭގައި އޭޝިޔާ، އެފްރިކާ، ކެރީބިއަން، ލެޓިފް އެމެރިކާ އަދި ޕެސިފިކް ސަރަހައްދުގެ ގައުމުތައް ހިމެނެ އެވެ.
