އެމްޑަބްލިއުއެސްސީން ބުނީ، އެ ކުންފުނީގެ ނަރުދަމާ ނިޒާމުގެ ޕަމްޕް ސްޓޭޝަންތައް ގާއިމުކުރެވިފައިވާ ސަރަހައްދުތަކުގައި ހުންނަ ނޭދެވޭ ވަހުގެ ސަބަބުން އާންމު ރައްޔިތުންނަށް އުނދަގޫވުން ނިމުމަކަށް ގެނައުމަށް އަމާޒުކޮށް އެ ސަރަހައްދުތަކުން ވަސްދުވުން ހުއްޓުވުމަށް ޒަމާނީ ވަސީލަތްތައް ގާއިމުކޮށް ބޭނުންކުރަން ފަށާފައިވާ ކަމަށެވެ.
އެމްޑަބްލިއުއެސްސީގެ މެނޭޖިން ޑިރެކްޓަރ އަބްދުލް މަތީން ވިދާޅުވީ، ފުރަތަމަ އޮޑަ ކޮންޓްރޯލް ސިސްޓަމް ބަހައްޓާ ބޭނުން ކުރަން ފަށާފައި ވަނީ އިންދިރާގާނދީ މެމޯރިއަލް ހޮސްޕިޓަލް ސަރަހައްދުގައި ހުންނަ ހަތަރު ނަމްބަރު ޕަމްޕް ސްޓޭޝަނުގައި ކަމަށާއި، ވައިސާފުކުރާ މި ނިޒާމުގެ ސަބަބުން ޕަމްޕް ސްޓޭޝަނުން ޖައްވުގެ ތެރެއަށްދާ ވައިގައި ހުންނަ ނޭދެވޭ ވަހުގެ މިންވަރު 99 އިންސައްތައިން ދަށް ކުރެވޭނެ ކަމަށް ބެލެވޭ ކަމަށެވެ.
އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ނޫސްވެރިންނަށް މައުލޫމާތު ދެއްވަނީ.
މަތީން ވިދާޅުވީ، ޒަމާނީ އާ މި ނިޒާމަކީ ޕަމްޕް ސްޓޭޝަންތައް ހުންނަ ސަރަހައްދުތަކުގެ ރައްޔިތުންނަށް އެ ސަރަހައްދުތަކުގައި ހުންނަ ނޭދެވޭ ވަހުގެ ސަބަބުން ތަހައްމަލު ކުރާ އުނދަގޫތަކަށް ދާއިމީ ހައްލެއް ފޯރުކޮށްދިނުމަށް އެ ކުންފުނިން އެކި ކަހަލަ ދިރާސާތައް ކުރުމަށްފަހު ބެހެއްޓިގެން ދިޔަ ނިޒާމެއް ކަމަށެވެ.
މާލޭގައި ބަހައްޓާފައި ހުރި ޕަމްޕް ސްޓޭޝަންތަކުން ނުބައި ވަސް ދުވުމުގެ ޝަކުވާތައް އާންމުން ކުރާތާ ގިނަ ދުވަސްތަކެއް ވަނީ ވެފަ އެވެ. އެމްޑަބްލިއުއެސްއީ އިން ބުނިގޮތުގައި ޕަމްޕް ސްޓޭޝަނުގައި ބެހެއްޓި ސިސްޓަމަކީ ގިނަ ދިރާސާތަކަކަށް ފަހު ބެހެއްޓި ސިސްޓަމެކެވެ.
މަތީން އިތުރަށް ވިދާޅުވީ މިއީ ޒަމާނީ ގޮތުން ތިމާވެއްޓާ ރައްޓެހި އަދި ދެމެހެއްޓެނިވި ގޮތަކަށް ހިދުމަތްތައް ފޯރުކޮށްދިނުމަށް ކުންފުނިން އަޅާ ފިޔަވަޅެއް ކަމަށެވެ.
