މިފްކޯގެ ދަށް ވަޒީފާތަކުގައި ތިބި މުވައްޒަފުން ވަކިކުރަމުންދާ ކަމަށް ބުނެ އަޑުތަކެއް ފެތުރެމުންދާތީ އެކަމާ ގުޅޭ ގޮތުން ސުވާލު ދެންނެވުމުން ކުންފުނީގެ އެ ކުންފުނީގެ އޮފިޝަލަކު ''ސީއެންއެމް'' ވިދާޅުވީ މިދިޔަ ޖޫން މަހުން ފެށިގެން މިހާތަނަށް މީހުން ވަކިކޮށްފައިވަނީ ކޫއްޑޫގައި ހިންގާ މަސް ކާރުހާނާ އިން ކަމަށެވެ.
އޭނާ ވިދާޅުވީ އެގޮތުން އެ ތަނުން ބައެއް މީހުން ވަކިކޮށްފައިވާ ކަމަށާއި މިފްކޯގެ ދަށުން ހިންގާ އެހެން ތަންތަނުގެ ކަންކަން ބަލަމުން އަންނަ ކަަމަށެވެ.
ވަކިކުރީ ޖެހިޖެހިގެން ދެތިން ދުވަހު ވަޒީފާއަށް ނުނުކުމެ, މަސައްކަތައް ފަރުވާ ކުޑަކުރަމުން އަންނަ ފަރާތްތައް ކަމަށެވެ. ނަމަވެސް ވަކިކުރީ ކިހާ މީހުންނެއް ދަންނަވަން ދަތި ކަމަށާއި މިފްކޯއާ ހަވާލާދީ ބައެެއް ނޫސްތަކުގައި ރިޕޯޓުކޮށްފައިވާ އަދަދު ރަނގަޅެއް ނޫން ކަމަށް އޮފިޝަލް ވިދާޅުވި އެވެ.
އެއްވެސް މުވައްޒަފަކު ސިޔާސީ ސަބަބަކަށް ވަޒީފާއިން ވަކިކޮށްފައެއް ނުވާނެ ކަމަށާއި ވަކި ކުރި މުވައްޒަފުންގެ ބަދަލަށް އާ މުވައްޒަފުން ނުނަގާނެ ކަމަށާއި މިވަގުތު އެންމެ ރަނގަޅަށް ހިންގެން އޮތީ ތިބި މުވައްޒަފުންނާއެކު ކަމަށް ވެސް އޭނާ ވިދާޅުވި އެވެ.
މިފްކޯގެ ހިންގުން ހަރުދަނާކުރަން އެ ކުންފުނީގެ އިސްވެރިންގެ މުސާރަ ކުޑަކުރަން ވެސް ވަނީ ނިންމައިފަ އެވެ.
އެގޮތުން ފިނޭންސް މިނިސްޓްރީއާއި ފިޝަރީޒް މިނިސްޓްރީ އަދި މިފްކޯ ގުޅިގެން އެ ކުންފުނީގެ ހިންގުން ހަރުދަނާކުރަން ކުރިއަށްގެންދާ މިފްކޯ ''އެފިޝަންސީ އެކްސަސައިޒް'' ގެ ދަށުން ބައެއް ފިޔަވަޅުތައް އަޅަން ކުންފުނީގެ ޑިރެކްޓަރުންގެ ބޯޑުން މިދިޔަ ބުދަދުވަހު ވަނީ ނިންމާފަ އެވެ.
އަޅަން ނިންމި ފިޔަވަޅުތަކުގެ ތެރޭގައި މިފްކޯގެ ސީއީއޯއިން ފެށިގެން މެނޭޖަރުންގެ ރޭންކްގައި ހިމެނޭ މުވައްޒަފުންނާއެކު ސީނިއަރ އަދި މެދު ފަންތީގެ މެނޭޖްމަންޓްގެ ވެރިންގެ މުސާރައިން 20 ޕަސެންޓް އުނިކުރުމާއި ޕާފޯމަންސް ދަށް މުވައްޒަފުން ވަޒީފާއިން ވަކިކުރުމާއި ޕްރޮބޭޝަންގައި ތިބި މުވައްޒަފުންގެ ތެރެއިން ކޮންމެހެން ކުންފުންޏަށް ބޭނުންވާ މުވައްޒަފުން ފިޔަވައި އެހެން މުވައްޒަފުން ވަކިކުރުން ހިމެނެ އެވެ.
