ފުލުހުންގެ ތަރުޖަމާނު އެސިސްޓެންޓް ކޮމިޝަނާ އޮފް ޕޮލިސް އަހްމަދު ޝިފާން ވިދާޅުވީ ދިވެހި ފުލުހުންގެ ހިދުމަތުން ނުވަތަ ކޮމިޝަނާ އޮފް ޕޮލިސްގެ ފަރާތުން އަންގާ އެންގުމެއްކަމަށް ސިފަވާގޮތަށް ބައެއް ފަރާތްތަކަށް އީމެއިލް ތަކެއް ލިބެމުންދާކަމުގެ މައުލޫމާތު އެ އިދާރާއަށް ލިބިފައިވާކަމަށެވެ. އެހެންނަމަވެސް އެ މެސެޖުތަކާއި މެއިލްތަކަކީ ފުލުހުން ފޮނުވާ މެސެޖްތަކެއް ނޫންކަމަށާއި އެހެންކަމުން އެ މެސެޖްތަކަށް ރިޕްލައިކޮށް ނުހެދުމަށް ޝިފާން ވަނީ އިލްތިމާސްކޮށްފައެވެ.
ދާދިފަހުން ބޮޑު ދެ ސްކޭމެއް ހިންގާ ދެމީހަކާއި ގުޅިފައިވާ އެކައުންޓުތަކަކުން 2 މިލިއަނަށް ވުރެ ގިނަ ރުފިޔާ ވަނީ ދަމައިގެންފައެވެ. އަދި ސްކޭމް ހިންގި މީހުން މި ފައިސާ އެކައުންޓްތަކުން ނެގީ 10 މިންޓްގެ ތެރޭގައިކަމަށް ފުލުހުން ވަނީ ބުނެފައެވެ.
މިއަހަރުގެ ފުރަތަމަ ފަސްމަހު ސްކޭމްގެ 877 މައްސަލަ ވަނީ ރިޕޯޓްކޮށްފައިވާއިރު އެ މައްސަލަތަކުން 11 މިލިއަނަށްވުރެ ގިނަ ރުފިޔާ ސްކޭމަރުން ފޭރިގަންފައިވާކަން ފުލުހުންގެ ހިސާބުތަކުން ދައްކައެވެ.
މި އަދަދުތަކަށް ބަލާ މިއަހަރު ނިމޭއިރު 49 މިލިއަން ރުފިޔާ ހަމައެކަނި ސްކޭމް ކޮށްގެން ފޭރިގަންނާނެ ކަމަށް ފުލުހުން ބުނެއެވެ.
ފުލުހުންގެ ހިސާބުތަކުން ދައްކާ ގޮތުން އެވްރެޖު ގޮތެއްގައި ސްކޭމް ކޮށްގެން ދުވާލަކު 6 މައްސަލަ ހުށައަޅައެވެ. އެއީ މަހަކު 192 މައްސަލައެވެ.
