މިކަން އިއުލާންކޮށްފައިވަނީ މާލެ ސަރަހައްދުގެ މަގުތަކުގައި އެއްގަމު އުޅަނދުތައް ތޮއްޖެހި މަގުތަކުގެ ކާރުބާރު ބޮޑުވުމުގެ މައްސަލައަށް ހައްލެއް ހޯދާ މަގުތައް އަމާން ހިތްފަސޭހަ ތަނަކަށް ހެދުމަށް ރޭ އިފްތިތާހުކުރި "މާލެފަހި" ޕްރޮގުރާމުގެ ތެރެއިންނެވެ.
މަގުތައް ތޮއްޖެހުން ކުޑަކުރަން މި ޕްރޮގްރާމްގެ ތެރެއިން މުހިއްމު ބަދަލުތަކެއް ގެންނަން ވަނީ ނިންމާފައެވެ. އޭގެތެރެއިން އެންމެ މުހިއްމު އެއް ބަދަލަކީ މާލޭގެ ގެތަކުން މިހާރު ކުނި ނަގަމުން އަންނަ ގަޑިތަކަށް ގެންނަން ނިންމި ބަދަލެވެ.
އަލަށް ގެނައި ބަދަލުން މީގެ ފަހުން މާލޭގެ ގެތަކުން ކުނި ނަގާނީ ރޭގަނޑު 10:00 ފެށިގެން ފަތިހު 5 ޖަހަން ދެނެވެ. މި ބަދަލަށް އަމަލުކުރަން ފަށާނީ އަންނަމަހުގެ ފުރަތަމަ ދުވަހުން ފެށިގެންނެވެ. މިހާރު މާލޭ މަގުތަކުން ކުނި ނަގަނީ ރޭގަނޑު 7 އިން ފެށިގެންނެވެ. އެއާއި އެކު މަގުތައް ތޮއްޖެހި ބާރު ބޮޑުވެގެންދެއެވެ.
ދެން ގެންނަ އަނެއް ބަދަލަކީ ދުވާލު ވަގުތަކުގައި ބޮޑެތި ވެހިކަލްތައް ދުއްވުން މަނާކުރުމެވެ.
މި ބަދަލީ މާލޭ މަގުތައް ތޮއްޖެހުން ކުޑަކުރަން މި ވަގުތަށް ގެންނަން ޖެހޭ ބަދަލެއްކަން ސަރުކާރުން ބުނެއެވެ. މި ބަދަލާއި އެކު ވަކި ސައިޒަކުން ބޮޑެތި އުޅަނދުތައް ބޭނުންކޮށްގެން މީގެ ފަހުން މާލޭގައި މުދާ އުފުލޭނީ ރޭގަނޑު 08:00 އިން ފަތިހު 05:00 އަށެވެ. ކުރިން މި ގޮތަށްް އަމަލުކުރަން އަންނަނީ ރޯދަމަހު އެކަންޏެވެ.
