މިއަދު ފާހަގަކުރަމުންދާ ރާއްޖޭގެ 59 ވަނަ މިނިވަން ދުވަހާ ގުޅުވާ އައްބާސް ވިދާޅުވީ ރާއްޖޭގެ މިނިވަންކަމަކީ ވަރަށް ބުރަ މަސައްކަތުން ސާބިތު އަޒުމަކާއެކު ކުރެވުނު މަސައްކަތުން ހޯދުނު މިނިވަންކަމެއް ކަމަށެވެ. އަދި މިނިވަންކަން ދެމެހެއްޓުމަކީ ކޮންމެ ދިވެހި ރައްޔިތެއްގެ ބޮލުގައި އެޅިފައިވާ މަސްއޫލިއްޔަތެއް ކަމުގައި ދެކެވަޑައިގަންނަވާ ކަމަށް އެމަނިކުފާނު ވިދާޅުވިއެވެ.
މިނިވަން ވީއޭ ހިތަށް އަރާފައި ކޮންމެ މީހަކު ވެސް އެ މީހަކަށް ފެންނަ ގޮތަކަށް އުޅޭނެ ގޮތަކަށް އުޅުން އެއީ އަދި މިނިވަންކަން ދެމި އޮންނާނެ ގޮތެއް ނޫން ކަން ވެސް އައްބާސްގެ ވާހަކަފުޅުގައި ފާހަގަކުރެއްވި އެވެ. އަދި ގައުމީ މިނިވަންކަން ދެމެހެއްޓުމަށްޓަކައި ކޮންމެ މީހެއްގެ ބޮލުގައި އެޅިފައިވާ މަސްއޫލިޔަތަކާއި ކޮންމެ މީހެއްގެ ބޮލުގައި އެޅިފައިވާ ޒިންމާއެއް އެބައޮތް ކަން ވެސް ފާހަގަކުރެއްވި އެވެ.
މި މޭރުމުން ދެއްކެވި ވާހަކަފުޅުގައި އައްބާސް ވަނީ ތަންކޮޅެއް ކުރިން އެމެރިކާގެ ރައީސަކު ވިދާޅުވެފައި އޮތް ބަސްފުޅެއް ފާހަގަކުރައްވައި މިއަދުގެ ޒުވާނުން އެ މެސެޖު ބަލައިގަންނަންޖެހޭ ކަމަށް ވިދާޅުވެފަ އެވެ.
މިނިވަންކަން ދެމެހެއްޓޭނީ އަޅުގަނޑުމެން މަސައްކަތްކޮށްގެން ކަމަށާއި އެކަން ކުރަން އެހެން ބަޔަކު ނާންނާނެ ކަމަށް ވެސް އެމަނިކުފާނުގެ މެސެޖު ނިންމަވައިލައްވަމުން ވިދާޅުވި އެވެ.
