ސްރީ ލަންކާގެ ނެޝަނަލް އެންޑް ޖޫނިއާ ނެޝަނަލް ލޯންގް ކޯސް ސްވިމިން ޗެމްޕިއަންޝިޕުން ރާއްޖޭން ހޯދި ފަސް މެޑައްޔަކީ، ތިން ލޯ މެޑަލް އާއި ދެ ރިހި މެޑަލް އެވެ. މެޑަލް ހޯދި އެތުލީޓުންނަކީ، އަމްނާ ތަޒްކިޔާ މިރުސާދު، ޒޯހާ އަޒްލީ ނަސީމް، މަލައިކާ ލިންޑާ އިމްރާން އަދި ޒާހާ ޒައިދުލް ހަލީލް އެވެ.
އިންޑިވިޖުއަލީ މި މުބާރާތުގައި އެންމެ މޮޅު ދިވެހި އެތުލީޓަކީ، 13 އަހަރުގެ ތަޒްކިޔާ އެވެ. ރާއްޖޭން ހޯދި ފަސް މެޑަލްގައި ވެސް އޭނާގެ ހިއްސާ އެބައޮތެވެ. ތަޒްކިޔާ ވަނީ އިންޑިވިޖުއަލް ތިން މެޑަލް ހޯދައިފަ އެވެ. ތަޒްކިޔާވަނީ ޖޫނިއާ ކެޓަގަރީގެ 200 މީޓަރު އިންޑިވިޖުއަލް މެޑްލޭ އިވެންޓުން ރިހި މެޑަލް އަދު 100 މީޓަރު ފްރީސްޓައިލް އިވެންޓުން ލޯ މެޑަލަކާއި 50 މީޓަރ ފްރީސްޓައިލް އިވެންޓުން ރިހި މެޑަލް ހޯދާފައެވެ. މި މުބާރާތުގައި، ރާއްޖޭގެ ޖޫނިއާ ޓީމު، 4 ގުނަ 100 މީޓަރު މެޑްލޭ ރިލޭ އަދި 4 ގުނަ 50 މީޓަރު ފްރީސްޓައިލް ރިލޭ އިވެންޓުން ލޯ މެޑަލް ހޯދި ޓީމުގައި ވެސް ތަޒްކިޔާ ހިމެނެ އެވެ.
