އީރާނުން މިހެން ބުނެފައި މިވަނީ އިސްރާއީލާއި ލުބްނާންގެ ހިޒްބުﷲ އާ ދެމެދު ހަމަނުޖެހުން އިތުރުވެފައިވާ ދަނޑިވަޅެއްގައި އެވެ. ގޯލާންގައި އިޒުރޭލުގެ ފުޓުބޯޅަ ދަނޑަކަށް ބަޔަކު ދިން މިސައިލް ހަމަލާތަކަކީ ލުބްނާންގައި ހަރަކާތްތެރިވާ ހިޒްބުﷲ ޖަމާއަތުން ދިން ހަމަލާތަކެއް ކަމަށް ބުނެ ބަދަލުހިފަން އިޒްރޭލުން އަންނަނީ ސިއްރިޔާތުގައި ރޭވުންތައް ރާވަމުން ކަމަށް މަޝްރަހު ދިރާސާ ކުރައްވާ ފަރާތްތަކުން އަންނަނީ ބުނަމުން ނެވެ.
މިކަމާއި ގުޅިގެން އީރާނުން ބުނީ އިޒުރޭލުން ގޯހެއް ހަދާފައި އެހެން ބައެއްގެ ބޮލުގައި ބަދުނާމު އަޅުވަން މަސައްކަތް ނުކުރުމަށް ނަސޭހަތް ދޭ ކަމަށެވެ. ނަސޭހަތުގެ އަޑު ނާހައި މާކުޅަދާނަ ބައެއް ކަމަށް ހެދިގެންފިނަމަ މަސްލަހަތު ދޫވެގެން ހިނގައިދާނެ ކަމަށް ނަސީރު ވިދާޅުވި އެވެ.
އިސްރާއީލުން ބުނާ ގޮތުގައި އެ ހަމަލާ ދިނީ ހިޒްބުﷲ އިންނެވެ. ނަމަވެސް ހިޒްބުﷲ އިން އެކަން ދޮގުކުރެއެވެ. ދެ ބައިމީހުންގެ ދެމެދުގައި އޮތް އެ ހަމަނުޖެހުމުގެ ސަބަބުން ހަނގުރާމައަކަށް ހިނގައިދާނެ ކަމުގެ ކަންބޮޑުވުންވެސް ވަނީ އިތުރުވެފަ އެވެ.
ބަދަލުހިފާނެ ކަމުގެ އިންޒާރު އިޒްރޭލުން ދެމުން ދާއިރު އެތައް އެއާލައިނަކުން މިހާރު ވަނީ ލުބްނާނަށް ދަތުރުތައް މެދުކަނޑާލައިފަ އެވެ.
އެ ގައުމުގެ ފޮރިން މިނިސްޓަރު އަބްދުﷲ ރަޝީދު ބޫ ހަބީބް ވިދާޅުވި ގޮތުގައި އިޒްރޭލުން ދީފާނެ ހަމަލާއެއް ހުއްޓުވުމުގެ ގޮތުން ޑިޕްލޮމެޓިކް ގޮތުން މިހާރުވެސް ގެންދަނީ އެކި މަސައްކަތްތައް ކުރަމުންނެވެ.
ބެއިރޫތު އެއާޕޯޓުގެ ފްލައިޓް އިންފޮމޭޝަން ބޯޑާއި ފްލައިޓް ޓްރެކިން ވެބްސައިޓް، ފްލައިޓްޓްރާޑާ24އިން ދައްކާ ގޮތުގައި ތުރުކީވިލާތުގެ އެއާލައިންސްއިން ވެސް ވަނީ ރޭގެ ދެ ފްލައިޓެއް ކެންސަލްކޮށްފައެވެ.
ތުރުކީވިލާތުގެ ބަޖެޓް ކުންފުނި ސަންއެކްސްޕްރެސް، ގްރީސްގެ އޭޖިއަން އެއާލައިންސް، އިތިއޮޕިއަން އެއާ އަދި ލުބުނާނުގެ މިޑްލް އީސްޓް އެއާލައިން (އެމްއީއޭ) އިން ވެސް ވަނީ މިއަދު ބެއިރޫތަށް ޖައްސަން ހަމަޖެހިފައިވާ ފްލައިޓްތައް ކެންސަލްކޮށްފަ އެވެ.
އިސްރާއީލާ ކުރިމަތިލާނެ ކަމަށް އިރާނުން ބުނެފައިވާއިރު، ހިޒްބުالله ޖަމާއަތުގެ ވެރިޔާ ހަސަން ނަސްރުﷲ ވެސް ވަނީ އިސްރާއީލުން ލުބުނާނާ ދެކޮޅަށް ބޮޑު ހަމަލާއެއް ދީފިނަމަ އެއްވެސް ހިފެހެއްޓުމެއް ގަވާއިދެއް ނެތި ހަނގުރާމަ ކުރާނެކަމުގެ އިންޒާރު ދެއްވައިފައެވެ.
އިސްރާއީލާއި ލުބުނާނުގެ ހަމަނުޖެހުންގަނޑު ފުޅާވަމުން އަންނައިރު، ޖަރުމަނުވިލާތާއި، ކެނެޑާ، ނެދަލެންޑްސް އަދި އެމެރިކާ ފަދަ ބައެއް ގައުމުތަކުން ވަނީ އެ ގައުމުތަކުގެ ރައްޔިތުން ލުބުނާނަށް ދަތުރުނުކުރުމަށް އިލްތިމާސްކޮށްފައެވެ.
7 އޮކްޓޯބަރު އިން ފެށިގެން ގާޒާއަށް މެދުނުކެނޑި އިޒްރޭލުން ދޭ ހަމަލާތަކުގައި މިހާތަނަށް 39،200 އަށްވުރެ ގިނަ މީހުން ވަނީ މަރުވެފަ އެވެ. އޭގެ ތެރޭގައި ގިނައީ ކަމާ ނުބެހޭ ކުޑަކުދިންނާއި އަންހެނުންނެވެ.
އިޒްރޭލުން ގާޒާގައި ހިންގަމުންދާ ގަތުލްއާންމު ހުއްޓާލުމަށް ގައުމުތަކުން ގޮވާލައި އެކަމަށް މަސައްކަތް ކުރަމުން އައި ނަމަވެސް، މިހާތަނަށް ވެސް އިޒްރޭލާއެކު އެފަދަ އެއްބަސްވުމަކަށް އާދެވިފައެއް ނުވެ އެވެ.
