އެމްޓީސީސީއާ ހަވާލުކޮށްފައިވާ 60 މަޝްރޫއުއެއް މަޑުޖައްސާލަން ނިންމާފައިވާ ކަމަށް ބައެއް މީޑިއާތަކުގައި ވަނީ ރިޕޯޓް ކޮށްފަ އެވެ. އެ ވާހަކަތައް މިނިސްޓަރު ވަނީ ދޮގު ކުރައްވާފަ އެވެ.
މިނިސްޓަރު މުއްތަލިބު "އެކްސް"ގައި ކުރެއްވި ޕޯސްޓެއްގައި ވިދާޅުވީ އެމްޓީސީސީއާ ހަވާލުކޮށްފައިވާ މަޝްރޫއުތަކުގެ ތެރެއިން އަމަލީ މަސައްކަތް ފެށިފައިވާ އެއްވެސް މަޝްރޫއެއް މަޑުޖައްސާލަން ސަރުކާރުން ނިންމާފައި ނުވާނެ ކަމަށާއި އެހެން ނަމަވެސް ސޮއިކޮށް އަމަލީ މަސައްކަތް ނުފެށިވާ މަޝްރޫއުތައް މިވަގުތައް ނުފަށައި އަމަލީ މަސައްކަތް ފެށިފައިވާ މަޝްރޫއުތައް ނިންމުމަށް އިސްކަން ދިނުމަށް ނިންމާފައިވާ ކަމަށެވެ.
މިގޮތަށް ނިންމި މައިގަނޑު ސަބަބަކީ މަޝްރޫއުތައް ކުރިއަށް ގެންދަން ބޭނުންވާ މިންވަރަށް ފާސްކޮށްފައިވާ މިއަހަރުގެ ބަޖެޓުގައި ފައިސާ ހިމަނާފައި ނުވުން ކަމަށްވެސް މިނިސްޓަރު ވިދާޅުވި އެވެ.
ސަރުކާރު ހަރަދުތައް ކުޑަކުރުމަށް މަސައްކަތްތަކެއް ކުރަމުންދާއިރު، ފަށާފައިވާ އެއްވެސް މަޝްރޫއެއް ހުއްޓާނުލާނެ ކަމުގެ ޔަގީންކަން މީގެކުރިންވެސް ސަރުކާރުން ވަނީ ދީފަ އެވެ.
