ކްލަބު މޯލްޑިވްސްއިން ބާއްވާ މުބާރާތްތަކަކީ، ކްލަބް މޯލްޑިވްސް ކްލަސިކް އާއި އެއިޓީންތާޓީ ފުޓްސަލް ފިއެސްޓާ އަދި ކްލަބް މޯލްޑިވްސް ކަޕެވެ.
މިދިޔަ އަހަރު އެއިޓީންތާޓީ ފުޓްސަލް ފިއެސްޓާގެ ވެސް ކްލަސިކް މުބާރާތެއް ބޭއްވި ނަމަވެސް، ކްލަބް މޯލްޑިވްސް އިން މި ފަހަރު ބާއްވާނީ އަންހެން ޑިވިޝަނަށް އެންމެ މުބާރާތެކެވެ. ތިން މުބާރާތުގައި އެކު ޖުމްލަ 60 އަށްވުރެ ގިނަ ޓީމު ވާދަކުރާއިރު، އެންމެ ގިނަ ޓީމު ބައިވެރިވަނީ ކްލެސިކްގައެވެ. އެންމެ ފުރަތަމަ ފަށާނީވެސް ކްލެސިކްއެވެ.
ކްލަބު މޯލްޑިވްސް ކްލަސިކްގެ ޗެމްޕިއަންކަން، މިދިޔަ އަހަރު ފައިނަލުގައި ޕީޖީ އޮފީސް ބަލިކޮށް ހޯދީ ޖުޑީޝަރީންނެވެ. މި ދެ ޓީމުވެސް މި އަހަރުވެސް ބައިވެރިވެއެވެ.
ކްލަބް މޯލްޑިވްސް ކަޕަކީ 2006 ވަނަ އަހަރުން ފެށިގެން ގަވާއިދުން ބާއްވަމުން އަންނަ މުބާރާތެވެ. ކޮވިޑް-19ގެ ސަބަބުން އެކި ކަންކަމަށް އައި މެދުކެނޑުމާ ހެދި 2020 ވަނަ އަހަރު ކްލަބް މޯލްޑިވްސް ކަޕް ނުބޭއްވުނެވެ. އެކަމަކު، އަލުން ފަށައި ފާއިތުވި ތިން އަހަރު އެ މުބާރާތް ވަނީ ކާމިޔާބުކަމާ އެކު ބާއްވައިފަ އެވެ.
ކްލަބް މޯލްޑިވްސްގެ އެންމެ ފޯރިގަދަ މުބާރާތް ކަމަށްވާ ކްލަބު މޯލްޑިވްސް ކަޕް، މިދިޔަ އަހަރު ކާމިޔާބުކުރީ ފައިނަލުގައި ރޯޑް ރެކްރިއޭޝަން ކްލަބް ބަލިކޮށް ކްލަބް ވެމްކޯ އިންނެވެ. ކްލަބް މޯލްޑިވްސްގެ އަންހެން ޑިވިޝަން އެއިޓީންތާޓީ މުބާރާތުގެ ޗެމްޕިއަންކަން ހޯދީ ޓީމު ފެނަކަ އިންނެވެ.
