އެއާ ބަސް 330 ގެ މަތިންދާބޯޓް ގަންނަން އައިލެންޑް އޭވިއޭޝަން ސާވިސް (އައިއޭއެސް) އިން ޓްރޫނޯޑް ކުންފުންޏާ އެކު ސޮއިކުރީ މިދިޔަ ހުކުރުދުވަހުއެވެ.
މޯލްޑިވިއަނުން މީހާރު ވަނީ މި ބޯޓަށް ކެޕްޓަނަކާއި ފަސްޓް އޮފިސަރެއް ހޯދަން އިއުލާންކޮށްފައެވެ. އެ ކުންފުނިން މި ބުނީ މި މަގާމުތަކަށް ޝައުގުވެރިވާ ފަރާތްތަކަށް އަންނަމަހުގެ 7 ވަނަ ދުވަހާއި ހަމައަށް ފުރުސަތު ހުޅުވާލާފައިވާކަމަށެވެ. އަދި މި މަގާމަށް ކުރިމަތިލާން ބޭނުންވާ ފަރާތްތަކުން ފޯމު ހުށައެޅޭނެކަމަށް އެކުންފުނިން ބުނެއެވެ.
މޯލްޑިވިއަންގެ ފުރަތަމަ އެއާބަސް އޭ 330-200 މަތިންދާބޯޓުގެ ދަތުރުތައް މި އަހަރުގެ ނޮވެމްބަރު މަހުގެ ތެރޭގައި ފެށޭނެ ކަމަށް މިނިވަންދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަދައްކަވަމުން ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ. އަދި އެބޯޓު ދަތުރުކުރާނީ ޗައިނާ އާއި އެނޫން ބައެއް ދުރު މަންޒިލުތަކަށްކަމަށްވެސް ރައީސް މުއިއްޒު ވިދާޅުވިއެވެ.
