މި މަހުގެ 10 ވަނަ ދުވަހު، ދަށު ކޯޓުތަކުގެ ފަނޑިޔާރުންގެ ތެރެއިން އެ ކޯޓުތަކުން ޖޭއެސްސީއަށް ފަނޑިޔާރުން އިންތިހާބުކުރަން ބާއްވާ އިންތިހާބު އޮންނައިރު، އަޒްފާ ގާޒީ ވެވަޑައިގެންފައިވަނީ ޖޭއެސްސީއަށް ދަށު ކޯޓުތަކުން ވާދަކުރައްވާ އެންމެ ފުރަތަމަ އަންހެން ފަނޑިޔާރަށެވެ.
މި ވަގުތު ޖޭއެސްސީގެ ކޮމްޕޮޒިޝަން އޮތް ގޮތުން މި އިންތިހާބު ކާމިޔާބު ކުރެއްވިއްޖެ ނަމަ އަޒްފާ ވެވަޑައިގަންނަވާނީ، ޖޭއެސްސީގައި މިވަގުތު އިންނަވާނެ ހަމަ އެކަނި އަންހެން ފަނޑިޔާރަށެވެ. މީގެ ކުރިން ޖޭއެސްސީގައި ސުޕްރީމް ކޯޓުގެ ފަނޑިޔާރު އައިޝާ ޝުޖޫން މުހައްމަދު އިންނެވި ނަމަވެސް އެކަމަނާވެސް މިހާރު ޖޭއެސްސީގައި ނީންނަވަ އެވެ.
ޖޭއެސްސީގެ ރައީސްކަމުގެ ދައުރު ފުރިހަމަ ކުރެއްވި ހިސާން ހުސެއިންގެ ދައުރު ނިމުމަށް ފަހު ޖޭއެސްސީގައި މި ވަގުތު އިންނެވި ހަމަ އެކަނި އަންހެން މެންބަރަކީ، އާންމުންގެ ތެރެއިން ރައްޔިތުންގެ މަޖިލިހުން ކަނޑައެޅި މެންބަރު އާމިނަތު އުއްމުކުލްޘޫމްއެވެ.
2019 ވަނަ އަހަރުގެ ފަހުކޮޅުން ފެށިގެން ސިވިލް ފަނޑިޔާރުކަން ކުރައްވަމުން ގެންދަވާ އަޒްފާއަކީ، ގާނޫނީ ދާއިރާއިން މަތީ ތައުލީމް ހާސިލް ކުރައްވައިގެން ހުންނެވި ބޭފުޅެކެވެ. އަޒްފާއާއެކު، ޖޭއެސްސީގެ އިންތިހާބަށް ހަތަރު ގާޒީއަކު ވާދަކުރައްވައެވެ. އޭގެތެރޭގައި ކްރިމިނަލްކޯޓްގެ ކުރީގެ އިސްގާޒީ ގާޒީ އަބްދުﷲ މުހައްމަދާއެކު ދެން ހިމެނިވަޑައިގަންނަވަނީ، ކްރިމިނަލް ކޯޓުގެ ގާޒީ އިބްރާހީމް އިހްސާން، ސިވިލް ކޯޓުގެ ގާޒީ ފަރުހާދު ރަޝީދު އަދި ސ. ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީއުއްދީން އަހްމަދެވެ.
ޖޭއެސްސީގެ މެމްބަރުންގެ ގޮތުގައި މިހާރު ތިއްބެވީ މަޖިލީހުން ކަނޑައެޅި މެމްބަރު، ކޮމިޝަނުގެ ރައީސް ހުސައިން ރިޒާ އާދަމް، ހައިކޯޓް ފަނޑިޔާރު މުހައްމަދު ނިޔާޒް، ރައްޔިތުން މަޖިލީހުގެ ރައީސްގެ ހައިސިއްޔަތު އަބްދުއްރަހީމް އަބްދުﷲ، ސުޕްރީމްކޯޓުގެ ފަނޑިޔާރު ހުސްނުއް ސުއޫދު، ބަންޑާރަ ނައިބު އަހްމަދު އުޝާމް، ސިވިލް ސާވިސް ކޮމިޝަންގެ ރައީސް މުހައްމަދު ނާސިހް، ރައީސްގެ މެމްބަރުގެ ގޮތުގައި މުހައްމަދު ސަމީރު، ގާނޫނީ ވަކީލުންގެ ތެރެއިން އަލީ އަބްދުއްލަތީފް، އާއްމުންގެ ތެރެއިން އާމިނަތު އުއްމުކުލްސޫމްގެ އިތުރުން ދަށުކޯޓްތަކުން އަލީ ޝަރީފްއެވެ. އާ އިންތިހާބަކަށް މިދަނީ، އަލީ ޝަރީފްގެ ދައުރު ހަމަވާތީ އެވެ.
