ގާނޫނުން ކަނޑައެޅި މިންގަނޑަށް ވުރެ ސިޔާސީ މީހާގެ ބާރުވެރިކަން ގަދައީ ކަމަށް ވެދާނެ އެވެ. ނުވަތަ ގާނޫނު ތަންފީޒު ކުރަން ތިބޭ މީހުންނަށް އެ ތަންތަނުގައި ތިބެވެނީ ހަޑިހުތުރު ބަހުން ވާހަކަ ދައްކާ އާންމު އިޖުތިމާއީ މިންގަނޑާ ހިލާފުވާ މީހުންގެ އެހީތެރިކަމެއް ލިބިގެން ކަމަށް ވެދާނެ އެވެ. އެފަދަ އަހުލާގީ މައްސަލަތައް ހައްލުނުވެ ދިގުލައިގެންދާއިރު އެނގޭ އެއް ކަމަކީ އެ ފަދަ ވާހަކަ ދައްކާ މީހާ އަށް އަމާޒުވާ ހަމަލަތަކަށް ވުރެ ނުރައްކާތެރި ހަމަލަތައް އަމާޒުވަނީ ދެއްކި ވާހަކަ ރިޕޯޓް ކުރި ބަޔަކަށް ކަމެވެ.
ބަދަލުވަމުންދާ ދުނިޔޭގައި ރިޕޯޓް ކުރާ ބަޔަކަށް ހަމަލަތައް އަމާޒުވާ އިރު އެ ވާހަކައިގެ އަސްލު އުފަން ކުރި މީހާ ހުންނަނީ ހާސްކަމެއް ނެތި އެވެ. ނަމަވެސް ތަހުޒީބު މުޖުތަމައެއްގެ ދެއްކި ވާހަކަ އެންމެ ފުރަތަމަ ޒިންމާވާން ޖެހޭނީ ވާހަކަ ދެއްކި މީހާ އެވެ. ނަމަވެސް މި ރާއްޖޭގައި އެކަން އެ މަގަށް ދާނެ ގޮތެއް ހޯދުން ނޫން ގޮތެއް މިހާރު ނެތެވެ. ވާހަކަ ދައްކާ މީހާ އާ މެދު ވާންވި ގޮތެއް ކަނޑައެޅެން ޖެހެ އެވެ. ސިޔާސީ މީހެއް ނަމަވެސް އޭނާ އެ ކުރި ކަމަކަށް ހައްގުވާ މިންވަރެއްގެ އަދަބެއް ލިބުން އެއީ އެ ފަދަ މައްސަލަަތައް މަދުވުމަށް އޮތް މަގަކަށް ވެދާނެ އެވެ. އާންމު އިޖުތިމާއީ މިންގަނޑުން ބޭރުވެ އާންމު ތަންތާނގައި ވާހަކަ ދައްކާ މައްސަލާ އަކީ ދޫކޮށްލައިގެން ތިބެވޭ ކަހަލަ މައްސަލައެއް ނޫނެވެ.
އާންމު އިޖުތިމާއީ މިންގަނޑުން ބޭރުވެ އާންމު ތަންތާނގައި ވާހަކަ ދައްކާ މައްސަލާގައި ކުރީގެ ޖަސްޓިސް މިނިސްޓަރު މުހައްމަދު މުއިއްޒު އަދުނާނުގެ ފޭސްބުކްގައި ކުރެއްވި ޕޯސްޓެއްގައި ވިދާޅުވީ ސިޔާސީ ޕްލެޓްފޯމްތަކުގައި ބައެއް ބޭފުޅުން ދައްކަވާ ބައެއް ކަހަލަ ވާހަކަފުޅުތަކަކީ އެފަދަ ތަންތަނުގައި ނުވަތަ އާއްމުންގެ ތެރޭ އެއްގޮތަކަށް ވެސް ދައްކަންނުވާހާ ދަށު ދަރަޖައިގެ، އެއްވެސް ސުލޫކީ އަހުލާގީ މިންގަޑަށް ނުފެތޭ ވާހަކަތަކެއް ކަމަށެވެ.
ކުރީގެ ޖަސްޓިސް މިނިސްޓަރު މުހައްމަދު މުއިއްޒު އަދުނާން
އިޖްތިމާއީ މައްސަލަތަކުގައި އަބަދުވެސް އަމިއްލަފުޅު ހިޔާލު އާއްމު ކުރައްވާ މުއިއްޒު އަދުނާނުގެ ފޭސްބުކްގައި ކުރިން މީހަކު ބުނެފައި އޮތްއެއްޗެއްވެސް ކޮންޓެކްސްޓުން ބޭރުން ބުނެ ފަތުރަމުންދާ ބޭ އަދަބީ ވާހަކަތަކުން އެބޭފުޅެއްގެ އަހުލާގީ، ސުލޫކީ އަދި ލިބިވަޑައިގެންފައިވާ ތައުލީމެއްގެ ފެންވަރާއި މިންވަރު ހާމަވެ، ފަލީހަތްވުންނޫންކަމެއް ނުވާ ކަމަށް އަދުނާނު ލިޔުއްވައިފާ ވެއެވެ. އަދި ވިދާޅުވީ ސަޕޯޓުކޮށް ފޯރިދޭ މީހުންވެސް ހަމައެފަދަ ކަމަށެވެ.
އަދުނާނު ވިދާޅުވި، މިގައުމުގެ އަހުލާގީ ފޭރާން ވީދިގެން މިދަނީ ސިޔާސީ މީހުން "ވިދާޅުވާ" ބައެއް ވާހަކަތަކުގެ ސަބަބުން ސިޔާސީ ވާދަވެރިންގެ މެދުގައި އުފެދެމުންދާ ބައިބައިވުމާއި ފިތުނައިގެ ބަހުސް ތަކުން ކަމަށް ގަބޫލުކުރާ ދިވަހިން ވެސް ގިނަ އެވެ.
އަދި ބައެއް ސިޔާސީ ޕޯޑިއަމްތަކާއި ޕާޓީތަކުގެ ޕްރޮމޯޝަން މީޑިއާ ޗެނަލްތަކުން ގެނެސްދޭ ކޮންޓެންޓަކީ މިހާރު އާއިލާ އާ އެކު ބަލަން ހެޔޮނުވާވަރުގެ "ޑައިލޮގަށް" ވަނީ ބަދަލުވެފަ އެވެ. ރިވެތި އަހުލާގީ މިންގަނޑުން ބޭރުވެ، ސިޔާސީ ބޭބޭފުޅުން ވާހަކަ ދައްކަވަމުންގެންދަވާތީ ބައެއް މީހުން ދަނީ އެކަމާ ޝަކުވާކޮށް ފާޑު ކިޔަމުންނެވެ.
ކުރީގެ މިނިސްޓަރުގެ ހިޔާލަކީ ރަނގަޅު މިސްރާބެއް ހިފިދާނެ ކަމެކެވެ. "މުޖުތަމައުގައި ހިފަހައްޓަން ޖެހޭ ރިވެތި އަހުލާގީ މިންގަނޑުން ބޭރު ވާހަކަ، އާއްމު ޕްލެޓްފޯމްތަކުގައި ދައްކާ ފަރާތްތަކާ މެދު ވެސް ފިޔަވަޅު އަޅަންޖެހެ އެވެ. އަދި އެ ފަދަ ވާހަކަ ދައްކާ ފަރާތްތަކާ މެދު ވެސް ފިޔަވަޅު އަޅަން ޖެހެ އެވެ. އެ ފަދަ ވާހަކަ ދައްކާ ފަރާތްތަކާ މެދު އަޅަންވި ފިޔަވަޅަކީ ކޮބައިތޯ ކަމާބެހޭ ފަރާތްތަކާއި އިލުމުވެރިން ހޯދަން ހިނގާށެވެ. ފަހަރުގައި މިހާރު ވެސް އެކަމަށް ފަރުވާއެއް އޮވެދާނެ އެވެ. އެހެން ވެއްޖެ ނަމަ އެ ބޭހެއް އަވަހަށް އެ ފަދަ ވާހަކަ ދައްކާ މީހުންނަށް ދެމާ ހިނގާށެވެ.
އަންނަށް އޮތް ޖީލު ސަލާމަތް ކުރުމަށްޓަކައި އެ ފަދަ ފިޔަވަޅުތަކާއި ފަރުވާތައް އާންމު ކުރަންޖެހެ އެވެ. މިއީ ރީތި އަހުލާގެއްގެ ވެރި ބައެއް ކަމަށް ބުނެ ހަދާއިރު އެކަން އަމަލީ ގޮތުން ދައްކަމާ ހިނގާށެވެ. ނަމަވެސް ފުރަތަމަ ފަށަންޖެހޭނީ ސިޔާސީ ވެރިންނާއި ބޮޑުންގެ ސަފުންނެވެ. އެއީ މިސާލު ދެެއްކުމަށެވެ. އޭރުން ހަޑިހުތުރު ވާހަކަ ދައްކާ ބަލި ޖެހިފައިވާ މީހުން އެ ބަލިން ސަލާތްވެ ރަނގަޅުވަމުން އަންނަތަން ފެނިގެން އޭގެ ދަށުން އަރައިގެން އަންނަ ކުދިންނާއި ޒުވާނުން ވެސް ސިޔާސީ ވެރިންގެ ދައްކާ ނަމޫނާއިން ރަނގަޅުވެދާނެ އެވެ. އޭރުން މި އެދޭ ކަހަލަ ދަށުދަރަޖައިގެ ހަޑިހުތުރު ވާހަކަ ދައްކާ މީހުން މަދު މުޖުތަމައަކަށް މި ރާއްޖެވެގެން ހިނގައިދާނެ އެވެ.
