އިހަވަންދިއްޕޮޅުގައި ބައިނަލް އަގްވާމީ ބަންކަރިން މަޝްރޫއު މިމަހުގެ 20 ވަނަ ދުވަހު ފަށާނެކަމަށް އިގްތިސާދާއި ބެހޭ ވަޒީރު މުހައްމަދު ސައީދު ވިދާޅުވެފައެވެ.
އިހަވަންދިއްޕޮޅުގައި ބައިނަލް އަގްވާމީ ބަންކަރިން މަޝްރޫއެއް ހިންގަން އެސްޓީއޯއިން ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލްއާ އެކު ޓާމް ޝީޓެއްގައި ސޮއިކުރީ މިއަހަރުގެ މާރިޗު މަހުގެ ތެރޭގައެވެ.
މި މަޝްރޫއާއި ގުޅޭ ގޮތުން ވާހަކަ ދައްކަވަމުން އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވީ އިންޓަނޭޝަނަލް ފިއުލް ބަންކަރިންގެ ހިދުމަތަށް ފަށާނީ އޯފްޝޯ ބަންކަރިން ހިދުމަތުގެ ގޮތުގައިކަށެވެ. އެގޮތަށް ފަށަނީ އެއްގަމުގައި ކުރާނަމަ އަނެއްކާވެސް އެކަމަށް އިތުރު ދުވަސްތަކެއް ނަގާނެތީކަމަށް އޭނާ ވިދާޅުވިއެވެ.
އެމްޑީ ޝިމާދު ވިދާޅުވީ މި ހިދުމަތް ފަށާނީ ދެ ވައްތަރެއްގެ ކާގޯއިން ކަމަށެވެ. އެެއީ އެމްޖީއޯ މެރިން ގޭސް އޮއިލް އާއި ވީއެލްއެސްއެފްއޯ ފިއުލް އޮއިލް ވިއްކާ ގޮތަކަށްކަމަށް ޝިމާދު ވިދާޅުވިއެވެ. އަދި ހިދުމަތް މާކެޓްކުރުގައި ވިޓޯލް މުހިއްމު ދައުރެއް އަދާކުރާނެކަމަށް އޭނާ ވިދާޅުވިއެވެ.
އޯފްޝޯކޮށް އަބަދު މި ހިދުމަތް ދިނުމަކީ އެންމެ ފީޒަބަލް ކަމަކަށް ނުވާނެތީ ބިން ހިއްކައިގެން ތާނގީ ބަހައްޓައިގެން އެ ތާނގީތަކުން ބަންކަރިންގެ ހިދުމަށް ވަރަށް ކައިރި މުސްތަގުބަލެއްގައި ދިނުމަކީ އެ ކުންފުނީގެ އަމާޒުކަމަށް ޝިމާދު ވިދާޅުވިއެވެ.
ރާއްޖޭގެ އުތުރުގެ ސަރަހައްދުން 300 އާއި 450 އާ ދެމެދުގެ އަދަދަކަށް ކޮމާޝަލް ބޯޓު ފަހަރު ދަތުރުކުރަމުންދާކަމަށާއި އޭގެތެރެއިން އެއް ޕަސެންޓަށްް ބަންކަރިން ހިދުމަތް ދިން ނަމަވެސް ފުރަތަމަ އަހަރުވެސް ރާއްޖެއަށް 400 މިލިއަން ޑޮލަރު ވަންނާނެކަމަށް އިކޮނޮމިކް މިނިސްޓަރު ސައީދު ވަނީ ވިދާޅުވެފައެވެ.
