މާލޭ ސިޓީ ކައުންސިލުން ކުރި އިއުލާނެއްގައި ބުނީ އެ ކައުންސިލުގެ ބެލުމުގެ ދަށުގައިވާ މާފަންނު ސަހަރާ ހުސްކުރުމުގެ މަސައްކަތް އަމިއްލަ ތަކެތީގައި ކުރާނެ ފަރާތެއް ހޯދުމަށް ބޭނުންވާތީ އެ މަސައްކަތަށް ބީލަން ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށެވެ.
އެތަން ހުސްކުރުމުގެ މަސައްކަތް ކުރަން ޖެހޭނީ އެ ކައުންސިލާއި އިސްލާމިކް މިނިސްޓްރީން ކަނޑައަޅާފައިވާ އުސޫލާ އެއްގޮތަށް އަދި މައުލޫމާތު ކަރުދާހުގައިވާ މިންގަނޑުތަކާއި އެއްގޮތަށް ކަމަށް ވެސް އެ އިއުލާނުގައި ބުންޏެވެ.
އިތުރަށް އެ އިއުލާނުގައިވާ ގޮތުން، އެ ސަހަރާއިން ހުސްކުރަނީ 36،153 އަކަފޫޓުގެ ސަރަހައްދެކެވެ. ނަމަވެސް، އެތަން ހުސްކުރަނީ ކޮން ބޭނުމަކަށް ކަމެއް މިހާތަނަށް އެ ކައުންސިލުން ހާމަކޮށްފައެއް ނުވެ އެވެ.
ސިޓީ ކައުންސިލުން ނިންމާފައި ވަނީ މާލޭގައި އިންދިރާސްވެފައި ހުރި ސަހަރާތައް ސާފުކޮށް އެ ބިންތަކުގައި ޕާކިން ބިލްޑިންތަކެއް އެޅުމަށެވެ. އެ ނިންމުން ނިންމީ ސިޓީ ކައުންސިލުން 27 އޯގަސްޓު 2019 ގައި ބޭއްވި އެ ކައުންސިލުގެ ޖަލްސާގަ އެވެ.
މިހާރުގެ ރައީސް ޑރ. މުހައްމަދު މުއިއްޒު މާލޭގެ މޭޔަރަކަށް ހުންނެވިއިރު އެ މަސައްކަތް ފެށި ނަމަވެސް އޭރު ދައުލަތުން އެ ބިން ސިޓީ ކައުންސިލާ ހަވާލުނުކޮށްގެން އެ މަސައްކަތް އޮތީ ނުފެށި އެވެ.
އެ ނިންމުމުގެ ދަށުން މާލޭގެ ހަތަރު އަވަށުގައި ހުރި ހަތަރު ސަހަރާ ސާފު ކުރުމާމެދު އިސްލާމިކް މިނިސްޓަރީގެ ލަފަޔަކަށް އެދުމުން، އިސްލާމީ ފަތުވާ ދޭ އެންމެ މަތީ މަޖިލީހުގެ ފަތުވާއެއް ސިޓީ ކައުންސިލަށް ދީފައިވެ އެވެ.
