ވަޒީރު އަލީ އިހްސާން ވިދާޅުވީ "ހޯޕް އައިލެންޑް" ގެ ކުރެހުން ނިމުމުން ދެން އޮތީ އެކަމަސް ފައިސާ ހޯދާނެ މޮޑެލް އިކޮނޮމިކް ކައުންސިލަށް ހުށަހެޅުން ކަމަށެވެ. އެ މަސައްކަތް މި ފެށޭ ހަފްތާގެ ތެރޭގައި ކުރައްވާނެކަމަށް ވަޒީރު އަލީ އިހްސާން ވިދާޅުވިއެވެ.
ކުށުގެ ވެށީގައި އުޅޭ ކުދިން އިސްލާހު ކުރުމަށް ފަހު އަނބުރާ މުޖުތަމައަށް ގެނައުމަށް ވަކި ރަށެއްގެ ގޮތުގައި ހަދާ "ހޯޕް އައިލެންޑް" ގައި އެ ކުދިންނަށް ސިފައިންނާއި ފުލުހުންގެ އިތުރުން ކަމާ ބެހޭ މިނިސްޓްރީތައް ގުޅިގެން ޕްރޮގްރާމެއް ހިންގުމަށް ރާވާފައިވާ ކަމަށް ވަޒީރި އަލީ އިހްސާން ކުރިން ވަނީ ވިދާޅުވެފައެވެ. އެ ޕްރޮގްރާމުގެ ތެރެއިން ދީނީ ތައުލީމާއި ރަސްމީ ތައުލީމާއި ކުޅިވަރާ އަދި ސައިކޯ ސޯޝަލް އިންޓަވެންޝަން ޕްރޮގްރާމުތައް ހިންގާނެ ކަމަށް އިހުސާން ވަނީ ވިދާޅުވެފައެވެ.
ހޯޕް އައިލެންޑްގައި އެ ކުދިންގެ އުމުރުން 18 އަހަރު ވަންދެން ގެންގުޅުމަށް ފަހު، ފުލުހުންނާއި ސިފައިންގެ ވަޒީފާއަށް ރަސްމީކޮށް ނަގާނެ ކަމަށްވެސް އިހުސާން ވިދާޅުވިއެވެ. ވަކި މުއްދަތަކަށް އެ ހިދުމަތުގައި އުޅެ، އިވެލުއޭޝަނެއް ހެދުމަށްފަހު ދާން ބޭނުންވާ ދާއިރާއަކުން ކުރިއަށް ދިއުމުގެ ފުރުސަތު އެ ކުދިންނަށް ދޭނެ ކަމަށް އިހުސާން ވަނީ ވިދާޅުވެފައެވެ.
ކުޑަކުދިންގެ އަދުލުގެ ނިޒާމް ފުރިހަމަ ކުރުމަށް ޖިނާއީ ކުށުގެ ޒިންމާ ނަގަން ޖެހޭ އުމުރު 15 އަހަރުން 12 އަހަރަށް ދަށް ކުރަން ސަރުކާރުން ނިންމާފައި ވަނީ އެފަދަ ޕްރޮގްރާމުތައް ހިންގަން ބޭނުންވާ ގާނޫނީ ބާރުވެރިކަން ހޯދުމަށް ކަމުގައި ދާހިލީ ވަޒީރު ވަނީ ވިދާޅުވެފައެވެ.
