މިިދޔަ މަހުގެ 29 ވަނަސުވަހު ނައިބު ރައީސް އީރާނަށް ވަޑައިގަތީ އެ ގައުމުގެ އާ ރައީސް ޑރ. މަސްއޫދު ޕެޒެޝްކިއާން މަގާމުގެ ހުވާކުރައްވާ ރަސްމިއްޔާތުގައި ބައިވެރިވެވަޑައިގަތުމަށެވެ.
ރައީސް އޮފީހުން އާއްމުކުރި މައުލޫމާތުގައި ބުނީ މި ދަތުރަށް ދައުލަތުން 464،617.43 ( ހަތަރު ލައްކަ ފަސްދޮޅަސް ހަތަރު ހާސް ހަ ސަތޭކަ ސަތާރަ ރުފިޔާ ސާޅީސް ތިން ލާރި ) ހަރަދުކޮށްފައިވާކަމަށެވެ.
އީރާނާއެކު ސިޔާސީ ގުޅުން ކަނޑާލާފައިވަނިކޮށް ހަތް އަހަރު ފަހުން އަލުން ދެ ގައުމުގެ ގުޅުން ގާއިމުކުރީ މިދިޔަ ވެރިކަމުގައި 2023 ވަނަ އަހަރުގެ މާރިޗުމަހުގެ 10 ވަނަ ދުވަހުއެވެ. ރައީސް އޮފީހުން ބުނީ ޑރ. މުއިއްޒުގެ ޒައާމަތުގައި ރާއްޖެއާއި އިރާނާއި އޮތް ގުޅުން އިތުރަށް ވަރުގަދަކުރާނެކަމުގެ ޔަގީންކަން މި ދަތުރުގައި ނައިބް ރައީސް ދެއްވިކަމަށް ރައީސް އޮފީހުން ބުނެއެވެ.
ރާއްޖެއާ އިރާނާއެކު އޮތް ސިޔާސީ ގުޅުން ކަނޑާލީ ރައީސް ޔާމީންގެ ވެރިކަމުގައި 2016 ވަނަ އަހަރުގެ މޭ 17ގައެވެ. ގުޅުން ކަނޑާލީ އޭރު އަރަބި ގަލްފު ސަރަހަދުގައި ޖެހުނު މައްސަލާގައި ސުލްހައަށް އިރާނުން މަސައްކަތް ނުކުރާކަމަށް ބުނެއެވެ. އޭރު އިރާނުގެ އިތުރުން ގަތަރާއިވެސް ރާއްޖެއިން ގުޅުން ކަނޑާލިއެވެ.
އިރާނާ ރާއްޖެއިން އެންމެ ފުރަތަމަ ސިޔާސީ ގުޅުން ގާއިމުކުރީ 1975 އަހަރުގެ ޖޫންމަހުގެ 2 ވަނަދުވަހުއެވެ.
