އިމްގްރޭޝަންގެ ރަސްމީ އެކްސްގައި ކުރި ޕޯސްޓެއްގައި ބުނީ ރާއްޖޭއިން ބޭރަށް ފުރާ ފަރާތްތަކަށް "ޓްރެވެލާސް ޑެކްލެރޭޝަން" ފޯމު ފުރަން ނުޖެހޭގޮތަށް ހެދުމުގެ މަގްސަދަކީ ރާއްޖެއިން ފުރާ ފަރާތްތަކަށް ލުއިފަސޭހަ އިންތިޒާމްތަކެއް ހަމަޖައްސައިދިނުން ކަމަށް އެ އިދާރާގެ ބަޔާނުގައި ބުނެފައިވެ އެވެ.
އިމިގްރޭޝަނުން މިއަދު ބުނީ މިއީ ރައީސް ޑރ. މުހައްމަދު މުއިއްޒުގެ ވިސްނުމާ އެއްގޮތަށް ނިންމި ނިންމުމެއް ކަމަށާއި މި ނިންމުން ތަންފީޒުކުރަން ފަށާނީ 15 އޮގަސްޓު އިން ފެށިގެން ކަމަށެވެ.
ނަމަވެސް، ރާއްޖެއަށް އަންނަ ބިދޭސީ ފަރާތްތަކުން ކުރިއެކޭ ވެސް އެއްގޮތަށް ރާއްޖެ އައުމުގެ 96 ގަޑިއިރު ކުރިން "ޓްރެވެލަރ ޑެކްލަރޭޝަން" ފޯމު ފުރިހަމަ ކުރަން ޖެހޭނެއެވެ.
މިއީ ކޮވިޑް-19 ގެ ސަބަބުން ރާއްޖެ އަންނަ ކޮންމެ މީހަކު ވެސް އަދި ރާއްޖޭން ބޭރަށް ދަތުރުކުރާ ކޮންމެ މީހެއް ވެސް 15 ޖުލައި 2020 އިން ފުރިހަމަ ކުރަން ޖެހުނު ފޯމެކެވެ. މި ފޯމް އޮންލައިންކޮށް ފުރިހަމަ ކުރަން ޖެހޭ ގޮތަށް ބަދަލުކުރީ 14 މާޗު 2021 ގަ އެވެ.
އިމިގްރޭޝަންގެ އަމާޒަކީ ހިދުމަތްތައް ހަރުދަނާކޮށް ދަތުރުފަތުރު ކުރާ އެންމެހާ ފަރާތްތަކަށް ވީހާވެސް ލުއިފަސޭހަ އިންތިޒާމްތަކެއް ހަމަޖައްސައިދިނުން ކަމަށް އެ އިދާރާއިން ވަނީ ބުނެފަ އެވެ.
