އެޗްޕީއޭއިން ނެރުނު ބަޔާނެއްގައި ބުނެފައި ވަނީ، މިހާރު ރާއްޖެއަށް ކުރަމުންދާ ވިއްސާރައާ ގުޅިގެން އެކަމަށް ދުރާލާ ތައްޔާރުވުމަށާއި، ވިއްސާރަވެ ފެންބޮޑުވުމާ ގުޅިގެން ސިއްހީ ނިޒާމުން ބަލަން ޖެހޭ ކަންކަން މޮނިޓާ ކުރުމަށާއި، އާންމުންނާއި މުއައްސަސާތަަކަށް ބޭނުންވާ މައުލޫމާތާއި އިރުޝާދު ފޯރުކޮށްދިނުމަށްޓަކައި އެ އިދާރާއާއި، ހެލްތު މިނިސްޓްރީން ގުޅިގެން މަސައްކަތްތަކެއް ކުރިއަށް ގެންގޮސްފައިވާ ކަމަށެވެ.
އެޗްޕީއޭއިން ބުނީ، ރާއްޖެއައް މިހާރު ކުރަމުންދާ ވިއްސާރައިގެ އަސަރު ބައެއް ސިއްހީ ހިދުމަތްދޭ މަރުޒަކުތަކަށް ކޮށްފައިވީ ނަމަވެސް ހިދުމަތް ހުއްޓުމެއްނެތި ކުރިއަށްދާ ކަމަށާއި، އެކަންކަން ހެލްތު މިނިސްޓްރިޏް ވަރަށް ގާތުން ބަލައި މޮނިޓާރ ކުރަމުން ގެންދާ ކަމަށެވެ.
މީގެ އިތުރުން، ފެންބޮޑުވެފައިވާތަންތަނާއި، ސެޕްޓިކް ޓެންކް ލީކް ވެފައިވާ ސަރަހައްދުތައް ސާފުކޮށް ޑީކޮންޓެމިނޭޓް ކުރުމުގައި އަމަލުކުރާނެ ގޮތާއި އެ މަސައްކަތްތަކުގައި ހަރަކާތްތެރިވާ ފަރާތްތަކުގެ ރައްކާތެރިކަން ކަށަވަރުކުރާނެ ގޮތުގެ މައުލޫމާތު ކަމާ ގުޅޭ މުއައްސަސާތަކަށް ހިއްސާކުރެވިފައިވާނެ ކަމަށްވެސް އެޗްޕީއޭއިން ވަނީބުނެފަ އެވެ.
އެޗްޕީއޭއިން ބުނީ، ވިއްސާރަވެ ފެންބޮޑުވުމާއި ސެޕްޓިކް ޓޭންކުން އޯވާފްލީވެ ނަޖިސް ބޭރުވުމާއި، ވިއްސާރައިގެ ސަބަބުން ފެން ހަރުލާފައި ހުރުމުން ބައެއް ބަލިތައް ފެތުރުމުގެ ފުރުސަތު ބޮޑު ކަމަށެވެ. އަދި އޭގެ ތެރޭގައި ބޭރަށް ހިންގުމާއި ހޮޑުލުން، ބުޅަލާއި މީދަލުގެ ނަޖިހުން ފެތުރޭ އެކި ބަލިތައް، ފަންގަސް ޖެހުމުގެ ސަބަބުން ނޭވާލާ ނިޒާމަށް ޖެހޭ ބަލިތައް، މަދިރީގެ ޒަރީއާއިން ފެތުރޭ ޑެންގީ ޗިކަންގުންޔާ އަދި ޒިކާ ފަދަ ބަލިތައް ކުރިއަށް އޮތް ދުވަސްތަކުގައި ގިނވެގެން ދިއުމަކީ އެކަށީގެންވާ ކަމެއް ކަމަށެވެ.
