މި ހަފްތާގެ އާދިއްތަ ދުވަހުން ފެށިގެން މުޅި ރާއްޖެއަށް އަންނަނީ ގުގުރުމާއި އެކު ބޯކޮށް ވާރޭވެހެމުންނެވެ. އަދި ވެރިރަށް މާލޭ ހިމެނޭހެން ގިނަ ރަށްތަކެއްގައި ފެންބޮޑުވެ ބައެއް ގެތެކަށް ފެންވަދެ އެކި ވަރުގެ ގެއްލުންތައް ވަނީ ލިބިފައެވެ.
އެންޑީއެމްއޭއިން ބުނީ މިހާރު ކުރަމުންދާ ވިއްސާރައާއި ގުޅިގެން ހާލުގައި ޖެހުނު ފަރާތްތަކަށް ބޭނުންވާ އެހީތެރިކަން އެ އިދާރާއިން ފޯރުކޮށްދެމުން ގެންދާކަމަށެވެ. އަދި ލިބުނު ގެއްލުންތަކުގެ އެސެސްމަންޓް ހެދުމުގެ މަސައްކަތް މާދަމާ ފެށުމަށް ތައްޔާރުވަމުން އަންނަކަމަށްވެސް އެންޑީއެމްއޭއިން ބުނެއެވެ.
ރާއްޖެއަށް ކުރަމުންދާ ވިއްސާރައި އެންމެ ބޮޑަށް އަސަރުކުރީ ހއ. އަތޮޅަށެވެ. އެއަތޮޅުގެ ހުރިހާ ރަށެއްގައި ފެން ބޮޑުވެ ބައެއް ގެއްލުންތައް ލިބިގެން އެންޑީއެމްއޭއަށް ވަނީ ރިޕޯޓްކޮށްފައެވެ. އަދި އެ އަތޮޅު ކެލާއަށް މިދިޔަ ހޯމަ ދުވަހު ވެހުނު ވާރޭގެ ނިސްބަތަކީ މިހާތަނަށް އެންމެ ގިނައި ވާރޭވެހުނު ކަމަށް ރިކޯޑްކުރެވުނު އަދަދުކަމަށް މޫސުމާއި ބެހޭ ގައުމީ އިދާރާއިން ވަނީ ބުނެފައެވެ. އެދުވަހު ކެލައަށް ވަނީ 231.5 މިލިމީޓަރުގެ ވާރޭ ވެހިފައެވެ.
މިހާރު ކުރަމުންދާ ވިއްސާރާގައި އެހީތެރިކަން ބޭނުންވާ ފަރާތްތަކަށް ސަރުކާރުން އެހީތެރިކަން ދެއްވާނެކަަމުގެ ޔަގީންކަން ރައީސް ޑރ. މުހައްމަދު މުއިއްޒު ވަނީ ދެއްވާފައެވެ.
