ޒަމީރު މިގޮތައް އިލްތިމާސްކުރެއްވީ ގްލޯބަލް ސައުތް ސަމިޓުގެ، ފޮރިން މިނިސްތަރުންގެ ސެޝަންގެ 3 ވަނަ ވޮއިސްގައި ވާހަކަދައްކަވަމުންނެވެ.
މިއަދު އިންޑިއާ ސަރުކާރުންގެ ފަރާތުން ކުރިއަށްގެންދިޔަ ގްލޯބަލް ސައުތު ސަމިޓް ބޭއްވީ ވާޗުއަލް ފޯމެޓެއްގައެވެ. އެ ސަމިޓް ބޭއްވީ "ޗާޓިން އަ ނިއު ޕެރަޑިގްމް ފޯ ގްލޯބަލް ސައުތް" މި ޝިއާރުގެ ދަށުންނެވެ.
މިނިސްޓަރު ޒަމީރު ދެއްކެވި ވާހަކަފުޅުގައި ގްރޫޕް އޮފް 20 (ޖީ20) ގެ ރިޔާސަތުގައި އިންޑިއާއިން ދައްކުވައިދިން ފާހަގަކޮށްލެވޭ ލީޑަޝިޕަށާއި، ޖީ20 ގެ ގައުމުތަކުގެ އިތުރުން ގްލޯބަލް ސައުތަށް ވެސް ހެޔޮ ބަދަލުތަކެއް އައިސްފައިވާ އިސްނެގުމަކަށް ތައުރީފު ކުރެއްވި އެވެ.
ދެމެހެއްޓެނިވި ތަރައްގީއަށްއޮތް ހުރަހެއްގެ ގޮތުގައި ދަރަނީގެ ވާޖިބުތައް ފާހަގަކުރައްވައި، ހާއްސަކޮށް "ރެސިލިއެންސް ބިލްޑިން" އަށް އަލިއަޅުވާލައްވަމުން، ލުއި ފައިނޭންސިން ނުވަތަ ދަރަނީގެ ސަޕޯޓް ލިބުން ހަނިކުރާ މަލްޓިލޭޓަރަލް ފްރޭމްވޯކްތަކަށް އަވަސް ފިޔަވަޅުތަކެއް އަޅަންޖެހޭ ކަމަށް ޒަމީރު ވިދާޅުވި އެވެ.
ޒަމީރު އިތުރަށް ވަނީ ސްމޯލްސް އައިލެންޑް ޑިވެލޮޕްމަންޓް ސްޓޭޓްސް (އެސްއައިޑީއެސް) އާއި ގްލޯބަލް ސައުތު އަށް މޫސުމީ އިންސާފާއި، ދުނިޔޭގެ ޑިމާންޑް އަދި ހައްގުވާ އިންސާފު ފޯރުކޮށްދިނުމުގެ އަވަސްކަން ފާހަގަކުރައްވާފައެވެ. އެއަށްފަހު އެ ސަމިޓްގައި ވާހަކަދައްކަވަމުން ޒަމީރު ވަނީ ގްލޯބަލް ސައުތުގެ ތަރައްގީގެ "ޓްރެޖެކްޓޯރީ"ތައް އަލުން ކަނޑައެޅުމާއި ހާސިލްކުރުމަށް ކޮންމެހެން ބޭނުންވާ ޑިޖިޓަލް ޓޫލްތައް ހަމަހަމަކަމާއެކު ލިބޭނެ ގޮތް ކަށަވަރުކުރުމުގެ މުހިންމުކަން ފާހަގަކުރައްވާފަ އެވެ.
ފޮރިން މިނިސްޓަރު ޒަމީރު އަދި އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރު
މިނިސްޓަރު ޒަމީރު ވާހަކަފުޅު ނިންމަވާލައްވަމުން ވިދާޅުވީ ދެކުނުގެ ހުރިހާ ދިމާލަކުން އެއްބާރުލުން އިތުރުކުރުމަކީ ދެމެހެއްޓެނިވި ތަރައްގީގެ ލަނޑުދަނޑިތަކާ ދިމާއަށް ފިޔަވަޅުތައް އަވަސްކުރުމުގެ މުހިންމު ކަމެއް ކަމަށެވެ.
ވޮއިސް އޮފް ގްލޯބަލް ސައުތު ސަމިޓަކީ ޖީ20 ގެ ރިޔާސީ ދައުރުގައި އިންޑިއާއިން ޖީ20 ނޫން މެމްބަރު ގައުމުތަކަށް ހާއްސަކޮށް ގްލޯބަލް ސައުތު އަށް ޕްލެޓްފޯމެއް ދިނުމަށް ކުރިއަށް ގެންދިޔަ ހަރަކާތެކެވެ. ބޮޑުވަޒީރު ނަރެންދުރަ މޯދީ ފައްޓަވައިދެއްވި މި އެއް ދުވަހުގެ ސަމިޓްގައި މިނިސްޓަރުންގެ ފެންވަރުގައި ދިހަ ޖަލްސާއެއް ކުރިއަށް ގެންދެވިފައިވެއެވެ. އެގޮތުން ފޮރިން މިނިސްޓަރުންގެ ސެޝަންގެ ރިޔާސަތު ބަލަހައްޓަވާފައިވަނީ އިންޑިއާގެ މިނިސްޓާ އޮފް އެކްސްޓާނަލް އެފެއާޒް ޑރ.ޖައިޝަންކަރެވެ.
މި ސަމިޓްގައި ބްރޫނާއީ، ކެމްބޯޑިއާ، ކިއުބާ، އިރާގު، ލާއޯ ޕީޑީއާރު، ލެސޯތޯ، މެލޭޝިއާ، ޕަޕުއާ ނިއު ގިނީ، ޕެނަމާ، ސޮލޮމަން އައިލެންޑްސް، ތަޖިކިސްތާން، ތުރުކްމެނިސްތާން އަދި ޓޫވާލޫގެ ފޮރިން މިނިސްޓަރުން ބައިވެރިވެވަޑައިގެންނެވި އެވެ.
