ވިއްސާރާގައި ލިބުނު ގެއްލުންތައް ބެލުމަށް އެސެސްމެންޓް ހެދުމުގެ މަސައްކަތް އެންޑީއެމްއޭއިން އަންނަނީ ކުރަމުންނެވެ.
އެ އިދާރާއިން ބުނީ ވިއްސާރާގައި މާލޭގައި ފެންބޮޑުވުމުގެ ސަބަބުން އެސެސްމަންޓް ހަދަންޖެހޭކަމަށް ފާހަގަކުރެވުނު 41 ގެއެއްގެ ތެރެއިން 37 ގެއެއްގެ އެސެސްމަންޓް މިހާރު ހަދާ ނިމިފައިވާކަމަށެވެ. ބަކީ ހުރި 4 ގެއިން އެސެސްމަންޓް ހަދަން ބޭނުން ނުވާކަން އަންގާފައިވާކަަމަށްވެސް އެ އިދާރާއިން ބުނެއެވެ.
އެންޑީއެމްއޭއިން ބުނީ ވިއްސާރާގައި ފެންބޮޑުވުމުގެ ސަބަބުން މާލޭގައި އިމާރާތަށާއި ހިފާ ގެންގުޅޭ ތަކެއްޗަށް -/819،549ރ ގެ ގެއްލުން ލިބިފައިވާކަމަށެވެ.
ކެލާގެ ގެއްގައި ފެންބޮޑުވެ ލިބުނު ގެއްލުން ފޮޓޯ: ކެލާ ކައުންސިލް
އެންޑީއެމްއޭއިން ބުނީ ރާއްޖެއަށް މިހާރު ކުރަމުންދާ ވިއްސާރާގައި މިއަދުގެ 14:00 އާ ހަމައަށް 13 ރަށަކުން 77 ގެއަކަށް ގެއްލުން ލިބި އެސެސްމަންޓް ފޯމް ހުށައަޅާފައިވާކަމަށެވެ. އަދި 3 ރަށެއްގެ ދަނޑުބިންތަކަށްވެސް ބޮޑެތި ގެއްލުން ލިބުނުކަމަށްވެސް އެ އިދާރާއިން ބުނެއެވެ. އެންޑީއެމްއޭއިން ބުނީ މިހާރު ކުރަމުންދަނީ ހުށައަޅާފައިވާ ގެއްލުންތައް ވަޒަންކުރުމުގެ މަސައްކަތްކަމަށެވެ.
