ޝަމީމު މަގާމުން އިސްތިއުފާދެއްވައި މިވަނީ އޭނާ މަގާމުން ވަކިކުރަން މިރޭ ބާއްވަން ރައްޔިތުން މަޖލީހުން ތާވަލުކުރި ޖަލްސާ ފެށެން ވަރަށް ކައިރިވެފައިވަނިކޮށެވެ.
ރައްޔިތުން މަޖިލީހުގެ މި ދައުރު ނިންމަންކަމަށް ބުނެ މިރޭ ބާއްވަން އޮތް ޖަލްސާގެ އެޖެންޑާގައި ހަމައެކަނި އޮތީވެސް ޝަމީމު މަގާމުން ވަކިކުރަން ވޯޓަށް އެހުމެވެ.
މަޖިލީހުގެ ޖުޑިޝަރީ ކޮމެޓީން މައްސަލަ ބަލާ ޝަމީމް ވަކިކުރަން ނިންމި މައިގަޑު ސަބަބެއްކަމަށް ބުނެފައިވަނީ ވަނީ ޖިނާއީ އަދުލުގައި ގާއިމްވެފައިވާ އުސޫލުތަކާ ހިލާފަށް ކުރީގެ ސަރުކާރުގެ ވެރިންނާ ގުޅޭ ބައެއް ބޮޑެތި މައްސަލަތައް އޭނާ އަނބުރާ ގެންދެވުންކަމަށެވެ.
މި ތުހުމަތުތަކަށް ޖަވާބުދާރީވާން ބޭއްވި ކޮމެޓީ ލައިވްކޮށް ގެންގޮސްދިނުމަށްް ޝަމީމް އެދުނެވެ. އެހެންނަމަވެސް ކޮމެޓިން ނިންމީ ބައްދަލުވުން ސިއްރުކުރާށެވެ.
ކޮމެޓީގައި ޖަވާބުދާރީވަމުން ޝަމީމް ވިދާޅުވީ އިތުބާރު ނެތްކަމަށް ބުނެ އެ ކޮމެޓީން ބަލަމުންދާ މައްސަލައަކީ އެއްވެސް އަސްލެއް ނެތް ތުހުމަތުތަކެއްގެ މައްޗަށް ބިނާކޮށް، ބަލަމުންދާ މައްސަލައެއް ކަމަށެވެ. އަދި ޝަމީމް ވަނީ އޭނާގެ ވަކިކުރަން ކުރި ހުރިހާ ތުހުމަތުތަކެއް ވެސް ދޮގުކުރައްވައިފަ އެވެ.
މަގާމުން ވަކި ކުރަނީ ގާނޫނާ ހިލާފު ކަމެއް ކޮށްގެން ނުވަތަ ހަވާލުކުރި މަސައްކަތް ނުކޮށްގެން ނޫން ކަމަށާއި ސަރުކާރުން އެކަން ކުރަނީ އޭނާ ލައްވައި ގާނޫނާ ގަވާއިދާ ހިލާފު އެއްވެސް ކަމެއް ނުކުރުވޭނެތީކަން ޝަމީމު މިއަދު ފާހަގަކުރެއްވި އެވެ.
އިސްތިއުފާގެ ސިޓީގައި ޝަމީމް ވިދާޅުވީ އޭނާގެ މައްޗަށް ތުހުމަތުކުރެވޭ ކަންކަން އާންމުކޮށް އިއުލާނު ކުރައްވާފައި، އެ ކަންކަމަށް އޭނާ ދޭން އޮތް ޖަވާބު، އާންމުންނަށް ނުއިވޭ ގޮތަށް ސިއްރުކުރުމަކީ، އަދުލް އިންސާފުގެ ހަމަތަކާއި ނެޗުރަލް ޖަސްޓިސްގެ އުސޫލުތަކާ ވެސް ހިލާފު ކަމެއް ކަމަށެވެ.
އެމްޑީޕީގެ ސުޕަ މެޖޯރިޓީ އޮތް 19 ވަނަ މަޖިލީހުން ޑިސެމްބަރު 2019ގައި ޝަމީމް އެ މަގާމަށް އައްޔަންކުރަން ފާސްކޮށްފައި ވަނީ 74 މެންބަރުންގެ ވޯޓާ އެކު އެވެ. ފަސް އަހަރު ދުވަހަށް އައްޔަން ކުރާ އެ މަގާމުގައި ޝަމީމުގެ ދައުރު ހަމަވާން ދެން ބާކީ އޮތީ ތިން މަހެއްހާ ދުވަހެވެ.
