ސައިކަލެއްގައި ދިޔަ ބަޔަކު ޕީޖީ ޝަމީމަށް ހަލަމާދިނީ މިދިޔަ ޖެނުއަރީމަހުގެ 31 ވަނަ ދުވަހުގެ ހެނދުނުއެވެ. މަރުތޭލަކުން ދިން ހަމަލާ އަމާޒުވީ ޝަމީމްގެ އަތަށެވެ.
މި މައްސަލާގައި ހަތް މީހެއްގެ މައްޗަށް ދައުވާކުރަން ފުލުހުން ޕީޖީ އޮފީހަށް ފޮނުވީ މިދިޔަ ބުދަ ދުވަހުއެވެ. މި އެންމެންގެ މައްޗަށް ދައުވާ އުފުލާ އެ މައްސަލަ ކްރިމިނަލްކޯޓަށްް ވަނީ ހުށައަޅާފައެވެ.
މި ހަތް މީހުންގެ މައްޗަށް އުފުލީ ނުރައްކާތެރި ހަތިޔާރެއް ބޭނުންކޮށްގެން ޤަސްދުގައި މީހަކު މަރާލަން އުޅުމުގެ ކުށުގެ ދައުވާއެވެ. މި ދައުވާ ކުރަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުންނެވެ.
ޝަމީމަށްް ދިން ހަމަލާގައި ދައުވާކުރާ މީހުން
ރ. އަލިފުށި، ރިވެލި / މިދުހަތު އާދަމް
ލ. ގަން، ތުނޑި، ޖަވާހިރުވިލާ / މުހައްމަދު ޖަޒްލާން
ދަފްތަރު ނަންބަރު ދރ 2247 / އަހުމަދު މައިސާން ހާޝިމް
ލ. މާމެންދޫ، މުރިނގު / ރަޖުވާން ލަތީފް
ތ. ގާދިއްފުށި، މުސްތަރީގެ / ޝަމާލް ހުސައިން
ތ. ދިޔަމިގިލި، ރުވާ / އަބާން އަބްދުލްހަންނާނު
އދ. މާމިގިލި، ކެމީހިޔާ / ޒަޔާން ނަސީރުގެ މައްޗަށެވެ.
މި މައްސަލައިގައި ހިމެނޭ މިދުހަތު އާދަމްގެ މައްޗަށް އުފުލާފައިވާ ދައުވާގައި ބުނެފައިވަނީ އޭނާ އިތުރު ބަޔަކާއެކު ޝަމީމުގެ ބޮލަށް ހަމަލާދިނުމަށް މަސައްކަތްކޮށް، ޝަމީމުއާ މެދު މާރާމާރީ ހިންގައި އަތުގެ މުލައްދަނޑި ޒަހަމްކޮށްލާފައިވާކަމަށެވެ.
މައްސަލާގައި ހިމެނޭ މުހައްމަދު ޖަޒްލާންގެ މައްޗަށް ކޮށްފައިވާ ދައުވާގައި ބުނެފައިވަނީ އިތުރު ބަޔަކާއެކު ޝަމީމަށް ހަމަލާދިނުމަށް ރާވައި، ހަމަލާދިން މިދުހަތު އާދަމް ގޮވައިގެން ސައިކަލެއްގައި ގޮސް ހަމަލާދިނުމުން ސައިކަލުގައި މިދުހަތު އާދަމް ގޮވައިގެން ފިލަން ގޮސްފައިވާކަމަށްެވެ.
އަހުމަދު މައިސާންގެ ހާޝިމްގެ މައްޗަށް އުފުލި ދައުވާގައިވަނީ އޭނާ އިތުރު ބަޔަކާއެކު ޝަމީމަށް ހަމަލާދިނުމަށް ރާވައި، ހަމަލާދިނުމަށް ބޭނުންކުރި ސައިކަލު ހޯދައިދީ އެކަމަށް މަގުފަހިކޮށްދީފައިވާކަމަށެވެ. ދެން މި މައްސަލައިގައި ހިމެނޭ ރަޖުވާން ލަތީފް، ޝަމާލް ހުސައިން، އަބާން އަބްދުލްހަންނާނު އަދި ޒަޔާން ނަސީރުގެ މައްޗަށް ކުރާ ދައުވާގައިވަނީ އެމީހުން ޝަމީމަށް ހަމަލާދިނުމަށް ރާވައި މިހަމާދިން އިރު، ހަމަލާދީ ނިމެންދެން ކާރެއްގައި އެތަނުގައި މަޑުކޮށްގެން ތިބެފައި، ހަމަލާދީ ނިމުމުން ހަމަލާދިން މީހުންނާއެކު އެސަރަހައްދުން ފިލައިގެން ގޮސްފައިވާކަމަށެވެ.
