މައުލޫމާތު ލިބިފައިވާ ގޮތުގައި ކުރީގެ ކުޅިވަރު ވަޒީރު އަހުމަދު ޒުހޫރު ލީޑް ކުރައްވާ ނޯމަލައިޒޭޝަން ކޮމިޓީގެ މަސައްކަތް ކުރިއަށްދަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އޮފީސް ވީރާނާވެފައި ވުމުން، ވަގުތީ ގޮތުން ގަލޮޅު ދަނޑުގައެވެ. ނޯމަލައިޒޭޝަން ކޮމިޓީއާ، ކުޅިވަރު ވަޒީރު މި ހަފްތާގައި ބައްދަލު ކުރައްވާނެ ކަމަށްވަނީ މައުލޫމާތު ލިބިފައެވެ.
ނޯމަލައިޒޭޝަން ކޮމިޓީގެ މަސައްކަތް ފެށިއިރު ރަސްމީ އޮފީހެއް އަދި އެއްވެސް ވަސީލަތެއްވެސް ނެތެވެ.
ނޯމަލައިޒިން ކޮމިޓީގެ މައިގަނޑު މެންޑޭޓުގައި ހިމެނޭ ބައެއް ކަންތައްތަކަށް ބަލާއިރު، އެފްއޭއެމް އިން ދުވަހުން ދުވަހަށް ކުރާ މަސައްކަތުގެ އިތުރުން، އެފްއޭއެމްގެ އިސްވެރިންނާއި އެހެނިހެން ފަރާތްތައް ގުޅިގެން ފީފާ އާއި އޭއެފްސީ ދީފައިވާ ފައިސާ ނަހަމަ ގޮތުގައި ބޭނުންކޮށްފައިވާނަމަ، އެ ފައިސާ ހޯދުމަށް ރާއްޖޭގެ ގާނޫނީ ނިޒާމްގެ ތެރެއިން ކުރަންޖެހޭ ކަންކަން ކުރުން ވެސް ހިމެނެ އެވެ. އަދި ފީފާ އިން އައްޔަންކޮށްފައިވާ އެކްސްޓާނަލް ފައިނޭންޝިއަލް ކޮންސަލްޓަންޓާ ގުޅިގެން އެފްއޭއެމްގެ ދަރަނިތައް ރީސްޓްރަކްޗާ ކުރުމުގެ ޕްލޭނެއް ހެދުމަކީވެސް އެ ކޮމިޓީގެ މެންޑޭޓުގައި ހިމެނޭ ކަމެކެވެ.
