މާޒިޔާއަށް އާ ކޯޗަކު ގެނެސް، އެކަމާ ގުޅިގެން ބޭއްވި ޕްރެސް ކޮންފްރެންސްގައި މާޒިޔާގެ ޗެއާމަން އަހްމަދު ސާޖިދު މިއަދު ވިދާޅުވީ ފުޓުބޯޅައިގެ ހާލަތު މިހާރު އޮތް ގޮތުން މާޒިޔާގެ ބޮލުގައި އެޅިފައި އޮތް ޒިންމާ ބޮޑު ކަމަށެވެ.
" އޭއެފްސީގައި ވެސް ކުޅެން ޖެހޭ ކޮންމެ ހާލަތެއްގައި ވިޔަސް މާޒިޔާ އަށް ވެވުނު ވަރެއް މި ކުރަނީ. ސަރުކާރުންނާއި އެހެނިހެން ފަރާތްތަކުގެ އެހީތެރިކަމާ އެކީގައި، މާޒިޔާ އަށް ސަޕޯޓެއް ލިބިއްޖިއްޔާ އަދި މި އަށް ވުރެ ރަނގަޅަށް ކުރެވޭތޯ ބަލާނަން، މާޒިޔާގެ ހުރި ފެންވަރަކުން، މާޒިޔާ އިން ދިވެހި ފުޓްބޯޅަ އަށް ކޮށްދެވެން ހުރި ހުރިހާ ކަމެއް ކޮށްދޭނަން."
މާޒިޔާއިން ފުޓްބޯޅައިގެ ކަންކަމުގައި ހަރަކާތްތެރިވަމުން އަންނަނީ ގައުމީ ކަމެއް ކަމުގައި ދެކިގެން ކަމަށް މާޒިޔާއިން ބުނިއިރު، މިދިޔަ އަހަރު، ސަރުކާރުން މާޒިޔާ ސްޕޯޓްސް އެންޑް ރިކްރިއޭޝަނަށް ފަސް މިލިއަން ރުފިޔާއަށް ވުރެ ގިނައިން ދީފައިވާ ކަމަށް ކުޅިވަރާ ބެހޭ މިނިސްޓްރީންވަނީ ބުނެފައެވެ.
މިދިޔަ އަހަރު މާޒިޔާއަށް، ސަރުކާރުން ކުރި ހޭދައިގެ ތަފްސީލް މިނިސްޓްރީން ދީފައިވާއިރު، މާޒިޔާއަށް 2023 ވަނަ އަހަރު ޖުމްލަ ފަސް މިލިއަނަށްވުރެ ގިނައިން ދީފައިވެއެވެ. މާޒިޔާއަށް މިދިޔަ އަހަރު ސަރުކާރުން ދީފައިވާ ފައިސާއަށް ބަލާއިރު، އޭއެފްސީ ކަޕްގެ މެޗުތަކަށް ދިން ފައިސާއާއި، ފުޓްބޯޅަ ސީޒަނަށް ތައްޔާރުވުމަށް ދިން ފައިސާ އަދި ޕްރެޒިޑެންޓްސް ކަޕްގެ އިނާމް ފައިސާ ހިމެނެއެވެ.
2023 ވަނަ އަހަރު، މާޒިޔާއަށް ދިވެހި ސަރުކާރުން ޖުމްލަ، 5،226،132.13 (ފަސް މިލިއަން، ދެ ލައްކަ ސައްބީސް ހާސް، އެއް ސަތޭކަ ބައްތިރީސް ރުފިޔާ، އަށާވީސް ލާރި) ދީފައިވާ ކަމަށް ކުޅިވަރު މިނިސްޓްރީން ބުންޏެވެ.
